Úkimet «Memlekettik qyzmet kórsetý týraly» zań jobasyn maquldady
Atalǵan qujatty tanystyrǵan QR Ekonomıkalyq damý jáne saýda mınıstri Erbolat Dosaevtyń atap ótýinshe, jańa zań jobasynda qyzmet kórsetýdi tutynýshylardyń ótinishi boıynsha jeke tártippen júzege asyratyn, olarǵa tıisti materıaldyq nemese materıaldyq emes ıgilikter berýge baǵyttalǵan jekelegen memlekettik fýnktsııalardy iske asyrý nysandarynyń biri retinde memlekettik qyzmet kórsetý uǵymynyń jańa anyqtamasy belgilengen.
Sondaı-aq, zań jobasynda «qyzmet kórsetýdi tutynýshy», «qyzmet kórsetýshi» jáne «memlekettik qyzmet kórsetýdi usynýshy» degen jańa uǵymdar engizildi.
«Qyzmet kórsetýdi tutynýshy» uǵymy Qazaqstanda memlekettik qyzmetti tutynýǵa quqyǵy bar tulǵalardyń aıasyn aıtarlyqtaı keńeıtedi. Atap aıtqanda, osy uǵymǵa memlekettik organdardan basqa jeke jáne zańdy tulǵalar, shetel azamattary men zańdy tulǵalar, sondaı-aq azamattyǵy joq tulǵalar kiredi»,-dedi E. Dosaev.
Mınıstrdiń aıtýynsha, «qyzmet kórsetýshi» qyzmet kórsetý standarttaryn bekitetin jáne memlekettik qyzmet kórsetý protsesin uıymdastyratyn organdar, sondaı-aq tıisti salada jáne óz deńgeıinde memlekettik qyzmet kórsetý protsesin uıymdastyratyn jergilikti atqarýshy organdar bolyp tabylady.
«Bul rette, «memlekettik qyzmet kórsetýdi usynýshy» tikeleı memlekettik qyzmet kórsetetin jeke jáne zańdy tulǵalar bolyp tabylady. Onyń ishinde memlekettik organdar men olardyń vedomstvolyq baǵynyshty uıymdary, memlekettik emes zańdy tulǵalar men azamattar da bola alady. Zań jobasyna qyzmet kórsetýdi tutynýshylardyń, qyzmet kórsetýshilerdiń jáne memlekettik qyzmet kórsetýdi usynýshylardyń quqyqtary men mindetteri aıqyndalady»,-dedi ol.