Úkimet memleket qaryzyn basqarýǵa qatysty birqatar shara qabyldaýda

NUR-SULTAN. QazAqparat – Qazirgi kezde memleket qaryzy qaýipsiz deńgeıde saqtalyp otyr. Bul týraly Parlament palatalarynyń birlesken otyrysynda 2021 jylǵy respýblıkalyq bıýdjettiń atqarylýy týraly esepti qaraý kezinde Premer-Mınıstrdiń orynbasary–Qarjy mınıstri Erulan Jamaýbaev málim etti, dep habarlaıdy QazAqparat tilshisi.

«Memleket qaryzynyń ósýi respýblıkalyq bıýdjet tapshylyǵyn jabý qajettiligimen jáne mańyzdy áleýmettik jobalardy qarjylandyrý úshin qaryz alýmen baılanysty boldy. Byltyrǵy jyldyń qorytyndylary boıynsha memleket boryshynyń deńgeıi jalpy ishki ónimge shaqqanda 27,4 paıyzdy qurady jáne búgingi tańda qaýipsiz deńgeıde saqtalyp otyr», - dedi E. Jamaýbaev.

Osy oraıda ol bul kórsetkish halyqaralyq qarjy jáne reıtıngtik uıymdardyń baǵalaýlarymen de rastalǵanyn jetkizdi.

«Degenmen, memleket qaryzyn basqarýdy odan ári jetildirý úshin kelesideı sharalar qabyldanady. Birinshiden, bıýdjet tapshylyǵy kezeń-kezeńimen azaıatyn bolady. Bul boryshtyń ósý qarqynyn tómendetýge yqpal etedi. Ekinshiden, kóleńkeli ekonomıkamen kúresti belsendi túrde jalǵastyramyz. Osy oraıda ákimshilendirýdi jaqsartý jáne tsıfrlandyrý arqyly salyq túsimderi birtindep ulǵaıtylady», - dedi Úkimet basshysynyń orynbasary.

Budan basqa, zańnamada syrtqy qaryz qarajatyn ýaqtyly ıgermegeni úshin memlekettik organnyń birinshi basshysynyń jaýapkershiligin belgileý jóninde norma qabyldanǵanyn atap ótý kerek.

«Jalpy, Úkimet júıeli túrde memlekettik jáne memleket kepildik bergen boryshtyń, sondaı-aq kvazımemlekettik sektor boryshynyń qalyptastyrylýyna jáne basqarylýyna baqylaýdy kúsheıtetin bolady. Osy turǵyda 2030 jyldarǵa deıin memlekettik qarjyny basqarý kontseptsııasy qabyldanatyn bolady», - dedi ol.

Budan buryn habarlanǵandaı, Erulan Jamaýbaev depýtattardyń bıýdjetke qatysty usynymdary Úkimet jumysynda eskeriletinin aıtty.

Jekeshelendirýge jatatyn nysandar tizimine engizý úshin birqatar basty krıterııler bekitildi.