Úkimet quramyna kirgen jańa mınıstr ant qabyldady

NUR-SULTAN. QazAqparat – Búgin Úkimet otyrysynda Mınıstrler kabıneti quramyna jańadan qosylǵan QR Ekologııa, geologııa jáne tabıǵı resýrstar mınıstri qyzmetine taǵaıyndaldy Serikqalı Brekeshev ant qabyldady, dep habarlaıdy QazAqparat tilshisi.

«Memleket basshysynyń Jarlyqtarymen Maǵzum Myrzaǵalıev Energetıka mınıstri jáne Serikqalı Brekeshev Ekologııa, geologııa jáne tabıǵı resýrstar mınıstri bolyp taǵaıyndaldy. Sizderdi quttyqtaımyn, jumysta tabys tileımiz», - degen Úkimet basshysy Asqar Mamın Serikqalı Amanǵalıulynan ant qabyldaýyn surady.

Óz kezeginde jańa mınıstr «Qazaqstan Respýblıkasynyń halqy men Prezıdenti aldynda óz Otany - Qazaqstan Respýblıkasynyń ekonomıkalyq jáne rýhanı damý isine barlyq kúsh jigerim men bilimimdi jumsaýǵa, memlekettiń Konstıtýtsııasy men zańdaryn qatań saqtaýǵa, ózimniń is áreketimde zańdylyq pen ádilettilik, azamattyq, ultaralyq jáne konfessııaaralyq tatýlyq prıntsıpterin ustanýǵa, Qazaqstan halqyna adal qyzmet etýge, óz elimniń memlekettiligi men dúnıejúzilik qoǵamdastyqtaǵy bedelin nyǵaıta beremin» dep saltanatty túrde ant berdi.