Úkimet krıptovalıýta máselesin arnaıy keńestiń talqylaýyna shyǵarady
QR Ulttyq ekonomıka mınıstri Tımýr Súleımenovtiń aıtýynsha, qazirgi kezde krıptovalıýtalar men blokcheın máselesi keńinen talqylanyp keledi. Biraq krıptovalıýtaǵa qatysty naqty ustanym joq. "Biz de osy máseleni zerdeleýge kiristik. Memleket basshysy naqty tapsyrma berdi. Biz xalyqaralyq tájirıbeni jan-jaqty zerttep, atalǵan jańa texnologııalardy óz elimizde engizýdi qarastyrýymyz qajet. Búginde arnaıy jumys toby quryldy. Oǵan Ulttyq bank, qarjy mınıstrligi men "Astana" Halyqaralyq qarjy ortalyǵy kiredi. Ashyǵyn aıtý kerek, álemde naqty bir ustanym joq. Bireýler krıptovalıýtany zańdastyrsa, endi bireýler múldem tyıym saldy. Sondyqtan ázirshe naqty bir baǵytqa túsý qıyn", - dedi T.Súleımenov xalyqqa esep berý kezdesýi kezinde.
Mınıstrdiń aıtýynsha, krıptovalıýtaǵa qatysty naqty ustanym bolmasa da, blokcheındi keńinen qoldaný qajet. "Blokcheındi notarıattan bastap salyq salasyna deıin jan-jaqty paıdalanýǵa bolady. Bul - jańa texnologııa. Ony iske asyrýymyz qajet. Al krıptovalıýtamen qıyndaý bolyp tur. Sebebi kez kelgen valıýta emıtenttiń naqty jaýapkershiligin kózdeıdi. Oǵan ulttyq bank jáne basqa mekemelerdiń ataýyn jaıdan-jaı jazbaıdy. Krıptovalıýtanyń emıtentin anyqtaý qıyn. Demek, jaýapkershiliktiń kimge artylatynyn bilmeısiń. Budan bólek, krıptovalıýtanyń emıssııasyna qatysty taǵy bir problema bar. Sondyqtan men ózim krıptovalıýtadan buryn blokcheındi qoldaımyn. Degenmen, biz osy saladaǵy jumysty jalǵastyramyz. Osy aıdyń aıaǵyna deıin Úkimet basshysy janyndaǵy ekonomıkalyq saıasat keńesiniń otyrysynda atalǵan máselelerdiń bárin qarastyratyn bolamyz", - dep atap kórsetti mınıstr.
Aıta keteıik, búgingi kezdesý kezinde mınıstr baılyqqa salyq salý máselesine qatysty óz oıyn aıtty.