Úkimet keıingi 10 jylda shaǵyn jáne orta bızneske ₸1,3 trln sýbsıdııa bólgen
Ulttyq ekonomıka mınıstrligi kásipkerlikti memlekettik qoldaý departamenti dırektorynyń orynbasary Mereı Isaevanyń sózinshe, qazir vedomstvonyń aldynda shaǵyn jáne orta bıznestiń ekonomıkadaǵy úlesin - 40 paıyzǵa, orta kásipkerliktiń jalpy ishki ónimdegi úlesin - 20 paıyzǵa jetkizip, kóleńkeli ekonomıkanyń úlesin - 12 paıyzǵa deıin túsirý, jumysy bar adamdardyń sanyn 5 mln-ǵa jetkizý maqsaty tur.
«Keıingi 10 jylda ekonomıkadaǵy shaǵyn bıznestiń úlesi 16 paıyzdyq pýnktige jetip, 35,7 paıyz boldy. Shaǵyn bıznesten jumys tapqandardyń sany 35 paıyz ósip, 3,5 mln adam boldy. Shaǵyn jáne orta bızneste jumys istep turǵan nysandar sany 44 paıyzǵa artyp, 1,4 mıllıonǵa jetti. Al tirkelgen kásipkerlik nysandarynyń sany – 1,6 mln. Bul 2012 jylmen salystyrǵanda 17 paıyz joǵary», - dedi UEM ókili.
Aıtýynsha, keıingi 10 jylda mınıstrlik arqyly 24 myń jobany sýbsıdııamen qoldaýǵa 1,3 trln teńge jumsalǵan.
«Tólengen sýbsıdııalardyń somasy 181 mlrd teńge boldy. 20 myń jobaǵa kepildik usyný baǵytynda 368 mlrd jumsaldy. Usynylǵan kepildik somasy – 203 mlrd teńge. Tyń bıznes ıdeıalardy iske asyrý úshin shaǵyn, orta jáne mıkro kásipkerlik nysandaryna 2,4 mlrd teńgeniń 645 granty berildi. Bıznes ıdeıalardy iske asyrý bastalǵannan beri 5 myńnan astam grant tólendi. Jetpeı turǵan ınfraqurylym túzýge baǵyttalǵan 41 jobaǵa 18 mlrd teńge baǵyttaldy», - dedi Mereı Isaeva.