Úkimet Qazaqstannan rýbldi áketý týraly qaýly jobasyn ázirledi

ASTANA. QazAqparat – Qazaqstan Ulttyq banki «QR qarjylyq turaqtylyǵyn qamtamasyz etýdegi keıbir máseleler týraly» Úkimet qaýly jobasyn ázirledi, dep habarlaıdy QazAqparat tilshisi.

Ashyq talqyǵa shyǵarylǵan qujatqa sáıkes, ekinshi deńgeıli bankterge qolma-qol Reseı rýblin bir rettik tártippen Qazaqstan aýmaǵynan áketýine ruqsat etiledi.

«Qazaqstan Respýblıkasynyń ekinshi deńgeıdegi bankterine Qazaqstan Respýblıkasynan qolma-qol Reseı rýblin áketýge ruqsat etilsin», - delingen qaýly jobasynda.

Ulttyq bank dereginshe, mundaı bastama rýbldi qolma-qol aqshasyz formaǵa konvertatsııalaý jáne bankterdiń korrespondenttik shottaryn toltyrý maqsatynda usynylyp otyr. Qaýly kúshine ense, onda ekinshi deńgeıli bankterge atalǵan valıýtany el aýmaǵynan alpys kún ishinde áketýine ruqsat etilmek.

Qujatty ashyq talqylaý 25 qarashaǵa deıin jalǵasady.