Úkimet ındýstrııalandyrý baǵdarlamasyna 112 mlrd teńge bóledi - QR Prezıdenti

ASTANA. QazAqparat - Úkimet ındýstrııalandyrý baǵdarlamasyna 112 mlrd teńge bóledi. Búgin Aqordada ótip jatqan QR Úkimetiniń keńeıtilgen otyrysynda Memleket basshysy Nursultan Nazarbaev Úkimetke osy máseleni tapsyrdy.

«Ekonomıkany túbegeıli ártaraptandyrý, sonyń ishinde eksportty arttyrý  bul ornyqtylyqtyń kepili. Úkimet tutastaı, barlyq deńgeıdegi ákimder tolyǵymen eksporttyq baǵdardy birinshi orynǵa qoıý kerek. Ońtústik Koreıa osynyń arqasynda ǵana ekonomıkasyn aldyńǵy qatarǵa súırep shyqty. Búkil el bolyp eksportqa jumys istedi. Biz de soǵan umtylatyn bolamyz»,- dedi Memleket basshysy.

Budan bólek, Elbasy ındýstrııalandyrý baǵdarlamasyna toqtala kele, jaýapty vedomstvo basshysyna qatań eskertý jasady.

«Bizge 100- 500 kásiporyndar kerek emes. Bizge taýaryn negizinen eksportqa shyǵaratyn, ónim beretin kásiporyn kerek. Bastapqyda jasaǵanymyz durys ta shyǵar. Qazir ár jobany tereńinen qarastyratyn bolamyz. Jańa besjyldyq jobalary tek qana shıkizattyq emes eksporttyq baǵdarǵa negizdeletin bolsyn. Eksporttyq áleýeti zor, ónimdiligi joǵary, ınnovatsııalyq  jobalardy irikteýde mine osylarǵa nazar aýdarylsyn. Osyǵan baılanysty Úkimetke baǵdarlamany qoldaýǵa qosymsha 112 mlrd teńge bólýdi tapsyramyn»,  - dedi N. Nazarbaev.