Úkimet eski jumys tásilin túbirimen joıý úshin erik-jiger tanytýy tıis - Toqaev

ASTANA. QazAqparat – Keıbir memlekettik qyzmetshiler óz jumysyna selqos qaraıdy. Bul týraly eldiń áleýmettik-ekonomıkalyq máseleleri jónindegi keńeıtilgen keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Men búgin reformalarymyzdy júzege asyrýdaǵy birqatar olqylyqtarǵa, túıtkilderge toqtaldym. Negizgi másele – jumystyń sapaly oryndalmaýynda. Sol sebepti naqty nátıjege qol jetkize almaı otyrmyz. Onyń túrli sebebi bar. Keıbir memlekettik qyzmetshiler, basshylar óz jumysyna selqos qaraıdy, belsendi emes. Ózine jaýapkershilik alýdan tartynady», - dedi Qasym-Jomart Toqaev.

Osy oraıda Prezıdent bul kemshilikter bıýdjet qarjysyn ıgerý isinde qatty baıqalyp turǵanyn aıtty.

«Olar jumysty sapaly oryndaýǵa emes, tapsyrmany der kezinde baqylaýdan alýǵa basa mán beredi. Sonyń zardabyn bárimiz tartyp otyrmyz. Jarııa etilgen kóptegen reforma áli de baıaý júrip jatyr. Ony moıyndaýymyz kerek. Sondyqtan Úkimet eski jumys tásilin túbirimen joıý úshin erik-jiger tanytýǵa tıis», - dedi Memleket basshysy.

Budan buryn habarlanǵandaı, Prezıdent barlyq deńgeıdegi ákimderdiń jumysyn jyl saıyn baǵalaý júıesin engizýdi tapsyrdy.

Memleket basshysy jańa jyldan beri Prezıdent Ákimshiliginiń qoǵamdyq qabyldaýynda 811 adam bolǵanyn aıtty.