Úkimet elektr energetıkasy týraly zań jobasyn Parlamentten qaıtaryp aldy

ASTANA. QazAqparat - Úkimet elektr energetıkasy týraly zań jobasyn Parlamentten qaıtaryp aldy. Bul týraly búgin Parlament Senatynyń jalpy otyrysynda depýtattardyń saýalyna jaýap bergen Energetıka mınıstri Vladımır Shkolnık málim etti.

«Biz qazirgi kúni depýtattardyń usynysy boıynsha «Elektr energetıkasy týraly» zań jobasyn shaqyrtyp alyp jatyrmyz, buǵan Úkimet te kelisimin berdi. Sonymen qatar, engizilip otyrǵan ózgerister, qýat naryǵy - munyń bári shynynda kúrdeli másele ári bul normalardyń barlyǵy bizdiń Eýrazııalyq ekonomıkalyq odaqtyń normalarymen birdeı bolýy kerek. 2019 jylǵa qaraı qol qoıylǵan qujattar boıynsha biz elektrenergetıkalyq rynoktardy biriktirýge tıispiz», - dedi V. Shkolnık.

Onyń sózine qaraǵanda, zań jobasy Eýrazııalyq ıntegratsııalyq úderister eskerile otyryp, tolyqtyrylatyn bolady.