Úkimet eldiń kólik jáne tranzıttik áleýetin barynsha paıdalaný jóninde usynys engizýi qajet - Prezıdent

NUR-SULTAN. QazAqparat – Úkimet eldiń kólik jáne tranzıttik áleýetin barynsha paıdalaný jóninde usynys engizýi qajet. Bul týraly Atyraý oblysynyń áleýmettik-ekonomıkalyq damý máseleleri jónindegi keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Meniń tapsyrmammen Úkimet jáne Prezıdent Ákimshiligi jol sapasyna qatysty jumystarda aıtarlyqtaı kemshilik jibergen tulǵalarǵa qatysty kadrlyq sheshim qabyldady. Bul jumys Úkimet pen ákimderdiń únemi baqylaýynda bolýy tıis. Jergilikti deńgeıdegi problemalar men kemshilikterdi tyńǵylyqty retteý talap etiledi jáne qajet bolǵan jaǵdaıdy tıisti sheneýnikter jazalansyn. Onsyz oń nátıjege qol jetkizý múmkin emes», - dedi Memleket basshysy.

QR Prezıdenti jol qurylysy salasyndaǵy standarttardyń múltiksiz saqtalýyna baqylaýdy kúsheıtý boıynsha keshendi is-sharalar qabyldaý qajettigin basa nazar aýdartty.

«Sondaı-aq Úkimetten eldiń kólik jáne tranzıttik áleýetin barynsha paıdalaný jóninde usynys engizýdi ótinemin. Olar jol salý jáne paıdalaný máselelerine ǵana qatysty bolmaýy tıis. Problemalardyń búkil keshenin sheshý qajet. Onyń sheteldik seriktestermen kelissózder jumysy, shekaradan jyldam ótý máselesi, joldy paıdalanǵany úshin aqy alýdy engiý bar. Básekelestik artyp keledi. Bir orynda turyp qalýǵa bolmaıdy», - dedi Qasym-Jomart Toqaev.