Úkimet el aýmaǵyna sheteldik avtomobılderdi ákelýdi shekteıtin tetikter ázirlep jatyr

NUR-SULTAN. QazAqparat – Qazaqstan Úkimeti el aýmaǵyna sheteldik avtomobılderdi ákelýdi shekteýge baǵyttalǵan tetikter ázirlep jatyr. Bul jaıynda Senat depýtattarynyń saýalyna QR Premer-Mınıstri Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

«Salyq zańnamasyna sáıkes tirkemelerdi qospaǵanda, Qazaqstan Respýblıkasynda tirkelgen jáne (nemese) esepte turǵan kólik quraldary kólik quraldaryna salyq salý obektileri bolyp sanalady. Osylaısha, shetelden kelgen kólik quraldaryn esepke qoıý máselesi kezek kúttirmeıtin másele bolyp tabylady dep esepteımiz», - dedi Úkimet basshysy jaýabynda.

Osy oraıda Álıhan Smaıylov Úkimet el aýmaǵyna sheteldik avtomobılderdi ákelýdi jáne paıdalanýdy shekteýge baǵyttalǵan tetikterdi ázirleý jáne basqa da ilespe máseleler boıynsha jumys júrgizip jatqanyn atap ótedi.

«Osyǵan baılanysty kórshi elderden (Reseı, Armenııa, Grýzııa, Qyrǵyzstan) kelgen avtokólik quraldaryna tolyq resimdelgenge deıin sol jerde ýaqytsha tirkeı otyryp salyq salý máselesin qarastyrýdy mezgilinen buryn dep sanaımyz», - dedi ol.