Úkimet basshysyna Qostanaıda qurastyrylyp EKSPO-ǵa jiberiletin avtobýstar kórsetildi

ASTANA. QazAqparat - Qostanaıda QR Premer-Mınıstri Baqytjan Saǵyntaev «SaryarqaAvtoÓnerkásip» JShS jumysymen tanysty, onda jańǵyrtý aıasynda shyǵarylatyn avtokólik jelisi ulǵaıtylyp, eksporttyq áleýeti júzege asyrylýda, dep habarlaıdy primeminister.kz .

QR Premer-Mınıstrine JAC S3 jáne PEUGEOT 301 shanaqtaryn biriktirýdiń jańa jelisiniń montaj jumystary týraly aqparat berip, shanaqtardy boıaý tsehtarynyń, jeńil avtokólikter men avtobýstardy qurastyrý jelisiniń jumystaryn kórsetti. 

Zaýyt qyzmetkerleri Baqytjan Saǵyntaevqa EKSPO-2017-ge jiberilgen IVECO Crossway avtobýstaryn, sonymen qatar osynda shyǵarylatyn jeńil avtokólikter men kommertsııalyq tehnıka jelisin kórsetti. Zaýytta 7 brend: Peugeot, SsangYong, Iveco, Hyundai, JAC, JAC Commercial, Ravon jáne Chevrolet bar. Budan ózge, elektromobılder óndirisi retke keltirilgen. 

Aıta ketken jón, Memleket basshysy Qazaqstannyń úshinshi jańǵyrýy aıasynda qajetti ınfraqurylymdy qurýdy qarastyra otyryp, eksportqa baǵdarlanǵan elektromobılder óndirisin odan ári damytý mindetin qoıdy. 

Búginde avtokólikter elimizdiń ishki naryǵy men kórshi Reseı memleketinde satylýda. «Holdıng Azııa Grýpp Tájikstan» kompanııasymen yntymaqtastyq týraly memorandýmǵa qol qoıylatyn bolady, onyń aıasynda Tájikstanǵa 2 myń JAC jáne Peugeot avtokólikteri jetkiziletin bolady.

«SaryarqaAvtoÓnerkásip» JShS 2010 jyly qurylǵan. Kásiporynda 2010 jyldan 2017 jylǵy sáýir aıyna deıin 26 345 avtokólik shyǵarylǵan. 2017 jyldyń І toqsanynda 971 kólik qurastyrylǵan. Zaýytta shamamen 600 jumys orny bar.