Úkimet basshysy: Jyl sońyna deıin ınflıatsııa deńgeıin 2 ese tómendetý – óte mańyzdy mindet

ASTANA. QazAqparat – Jyl sońyna deıin ınflıatsııa deńgeıin 2 esege tómendetý – óte mańyzdy mindet. Bul týraly Májilistiń jalpy otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Maǵan artqan senimderińiz úshin shynaıy rızashylyǵymdy bildirgim keledi. Bul – men úshin zor jaýapkershilik.

Qurmetti Qasym-Jomart Kemeluly! Siz aıqyndap bergen áleýmettik-ekonomıkalyq máseleler, aryqaraı damý boıynsha, halqymyzdyń ál-aýqaty men ómir súrý sapasyn arttyrý boıynsha mindetter Úkimet jumysynyń negizgi basymdyǵy bolady.

Eń aldymen, biz Memleket basshysynyń saılaýaldy baǵdarlamasyn jáne «Amanat» partııasynyń baǵdarlamasyn iske asyramyz. Sonymen birge, basqa partııalar men depýtattardyń, bıznes qaýymdastyqtyń, azamattarymyzdyń syndarly usynystaryn eskeretin bolamyz.

Orta merzimdi kezeńde ekonomıkamyzdyń ósýin 5 paıyzǵa jetkizý jáne osy jyldyń aıaǵyna deıin ınflıatsııa deńgeıin 2 ese tómendetý – biz úshin óte mańyzdy mindet», - dedi Úkimet basshysy.

Onyń atap ótýinshe, kásipkerlikti qoldaý jáne bıznes ahýaldy jaqsartý jónindegi keshendi sharalar, sondaı-aq bıznestiń túıtkildi máselelerin sheshý, halyqty jumyspen qamtý jáne azamattarymyzdyń naqty tabysyn ósirý negizgi baǵyttardyń biri bolady.

Aıta ketsek, búgin Memleket basshysyna «AMANAT» partııasynyń atynan Premer-Mınıstr laýazymyna Álıhan Smaıylovtyń kandıdatýrasy usynylǵan edi.

Munan soń Májilistiń plenarlyq otyrysynda Memleket basshysy Qasym-Jomart Toqaev Premer-Mınıstr laýazymyna Álıhan Smaıylovty taǵaıyndaý úshin depýtattardyń kelisim berýin surady.

Palata depýtattarynyń basym bóligi kelisim bergennen keıin Memleket basshysy Qasym-Jomart Toqaev Álıhan Ashanuly Smaıylovty Qazaqstan Respýblıkasynyń Premer-Mınıstri laýazymyna taǵaıyndaý týraly Jarlyqqa qol qoıdy.