Úkimet basshysy jańa jylý berý maýsymy boıynsha tapsyrma berdi

NUR-SULTAN. QazAqparat – QR Premer-Mınıstri Álıhan Smaıylov oblys ákimderine jańa qurylystardy qajetti ınjenerlik ınfraqurylymmen ýaqtyly qamtamasyz etýdi tapsyrdy, dep habarlaıdy QazAqparat tilshisi.

«Jalpy ótken jylytý kezeńi shtattyq rejımde ótti. Degenmen maýsym aıaqtala bere Petropavldaǵy jylý ortalyǵynda tótenshe jaǵdaı oryn aldy. Osyǵan baılanysty myna máselelerdi atap ótkim keledi.

Birinshi. Energetıka mınıstrligi men óńir ákimdikteri jylý berý maýsymy bastalmaı turyp, energetıkalyq nysandardy tolyq tekserip, jylý ortalyqtarynyń daıyndyǵy týraly Úkimetke baıandaýy tıis», - dedi Úkimet basshysy.

Sondaı-aq ol oblys ákimdikterine aldaǵy jylý berý maýsymyna daıyndyq sapasyn arttyryp, tekserý barysynda anyqtalǵan eskertýler men kemshilikterdi joıýdy tapsyrdy.

«Óńir ákimdikteri jańa qurylystardy iske qosý úshin olardy kommýnaldyq jáne ınjenerlik ınfraqurylymmen ýaqytyly qamtamasyz etýge nazar aýdarsyn.

Osyǵan baılanysty ákimdikter jyl sońyna deıin bas josparlarmen úılestire otyryp, jylý jáne elektrmen jabdyqtaý shemalaryn jańartý qajet.

Tutynýshylardyń kommýnaldyq qyzmetteri úshin debıtorlyq bereshegin azaıtý jáne energııa óndirýshi uıymdardyń otyn jetkizýshiler aldyndaǵy bereshegin óteý jóninde sharalar qabyldaý qajet», - dedi Premer-Mınıstr.

Buǵan deıin QR Ulttyq ekonomıka mınıstri Álibek Qýantyrov aldaǵy 4 jylda aýyldardaǵy ınfraqurylymǵa 670 mlrd teńge bólinetinin málim etken edi.