Úkimet basshysy zańsyz shyǵarylǵan aktıvterdi qaıtarý jónindegi zań jobasyna qatysty tapsyrma berdi

ASTANA. QazAqparat - Ádilet mınıstrligi zańsyz shyǵarylǵan aktıvterdi qaıtarý jónindegi zań jobasyn Parlamentke ýaqytyly engizýi tıis. Bul týraly Úkimet otyrysynda Prezıdenttiń Parlament sessııasynyń ashylýynda bergen tapsyrmalaryn iske asyrý barysyn talqylaý kezinde Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Úkimet Bas prokýratýramen birlesip, elden Zańsyz shyǵarylǵan aktıvterdi memleketke qaıtarý jónindegi zań jobasyn ázirledi. Onyń negizgi maqsaty – qoǵamdaǵy áleýmettik ádilettilikti qalpyna keltirý. Ádilet mınıstrligi jobanyń Parlamentke ýaqytyly engizilýin qamtamasyz etýi kerek», - dep tapsyrdy Á. Smaıylov.

Budan bólek, Úkimet basshysy memlekettik basqarýdyń tıimdiligin arttyrý máselesine toqtaldy.

«Memleket basshysy memlekettik basqarýdyń tıimdiligin jáne strategııalyq josparlaý sapasyn arttyrý qajet ekenine nazar aýdardy. Ulttyq ekonomıka mınıstrligi Strategııalyq josparlaý jáne reformalar, Memlekettik qyzmet isteri jónindegi agenttiktermen jáne basqa da múddeli memlekettik organdarmen birlesip, Qazaqstannyń 2050-shi jylǵa deıingi damý strategııasyn naqtylaý boıynsha jumys isteýi tıis. Qazirgi jaǵdaıdy eskere otyryp, maqsatty kórsetkishterge muqııat taldaý júrgizý kerek. Buǵan sarapshylar men bıznes ókilderin tartý qajet», - dedi Premer-Mınıstr.