Úkimet basshysy tútin murjasy qulaǵan Petropavl jylý ortalyǵyna bardy
«Ortalyq Azııa Elektroenergetıkalyq Korporatsııasy» AQ dırektorlar keńesiniń múshesi Sergeı Kan men «SEVKAZENERGO» AQ bas dırektorynyń m. a. Andreı Kalınıchev kásiporynnyń qazirgi jaǵdaıy, qalpyna keltirý jumystaryn júrgizý josparlary týraly baıandady. Úkimet basshysy barlyq jabdyqqa muqııat tehnıkalyq tekseris júrgizýdi jáne jóndeý jumystaryn ýaqytyly aıaqtaýdy tapsyrdy.
Bul rette, turǵyndardy jazda ystyq sýmen qamtamasyz etý jáne jańa jylytý maýsymyn belgilengen merzimde bastaý asa mańyzdy.
«Barlyq jumysty sapaly, kidirissiz, kestede belgilengen merzimde aıaqtaý qajet. Kompanııa basshylyǵy barlyq qajetti qarajatty tabýy kerek», — dedi Álıhan Smaıylov.
Sondaı-aq Energetıka mınıstrligine respýblıkanyń jylý elektr ortalyqtary men sý elektr stantsııalarynda olardyń tehnıkalyq jaı-kúıi men aldaǵy jylytý maýsymyna daıyndyǵy turǵysynan jospardan tys tekseris júrgizý tapsyryldy. Buǵan qosa, sapar barysynda Álıhan Smaıylov ártúrli qýattaǵy transformatorlar men shkaf konstrýktsııalaryn shyǵarýmen aınalysatyn Petropavl elektr tehnıkalyq zaýytyna bardy. «Oblysta elektr tehnıkalyq zaýytty iske qosý – bul jumys istemeı turǵan ınfraqurylymǵa tıimdi ınvestıtsııa salyp, jańa kásiporyndar qurýdyń aıqyn mysaly. Jobanyń iske asyrylýy óńirdiń mashına jasaý salasyna oń áserin tıgizip, shıkizattyq emes eksport kólemin ulǵaıtýy tıis, bul jalpy óńdeý ónerkásibiniń ósimin qamtamasyz etedi», — dep atap ótti Álıhan Smaıylov.
Premer-Mınıstr Indýstrııa jáne ınfraqurylymdyq damý mınıstrligine Qarjy mınıstrligimen birlesip, Petropavldaǵy toqtap turǵan obektilerdiń (ǵımarattar men qurylystardyń) bazasynda jańa óndiristik alańdar qurý úshin «Soltústik» ÁKK jarǵylyq kapıtalyn ulǵaıtýǵa qarajat bólýdi tapsyrdy.
Budan keıin Álıhan Smaıylov M. Qozybaev atyndaǵy SQMÝ-dyń jańa oqý-zerthanalyq korpýsynyń qurylys alańyna bardy. Ony bıyl paıdalanýǵa berý kózdelgen. «Memleket basshysy Qazaqstanda bedeldi sheteldik joǵary oqý oryndarynyń fılıaldaryn ashýdy tapsyrdy. M. Qozybaev atyndaǵy SQMÝ bazasynda Arızona ýnıversıtetiniń fılıalyn ashý – osyndaı alǵashqy jobalardyń biri. Úkimet ınjenerlik jáne agrotehnıkalyq ǵylymdar salasynda halyqaralyq deńgeıdegi mamandardy daıarlaýǵa óńir qajettilikteri úshin 1500 grant bóldi», — dedi ol.
Álıhan Smaıylov jańa oqý-zerthana korpýsy men 600 oryndyq eki stýdentter jataqhanasynyń qurylysyn belgilengen merzimde aıaqtaýdy tapsyrdy. Sondaı-aq QR Premer-Mınıstri Petropavldaǵy Sh. Ýálıhanov kóshesindegi jeti jańa kóp páterli úıdiń qurylys barysymen tanysty. Joba boıynsha páterlerdiń jalpy sany – 684. «Jyl saıyn biz qurylys qarqyny aıtarlyqtaı artyp kele jatqanyn kórip otyrmyz.
«Nurly jer» baǵdarlamasy aıasynda Úkimet jańa turǵyn úı men ınjenerlik jelilerdi salýǵa bıýdjetten edáýir qarajat bólýde. Osyǵan baılanysty barlyq joba boıynsha júrgizilip jatqan jumystardyń sapaly bolýyn qadaǵalaý qajet», — dedi Álıhan Smaıylov.
Premer-Mınıstrdiń jumys sapary barysynda barǵan taǵy bir nysany «RımQazAgro» JShS qaǵaz fabrıkasynyń qurylysy boldy. Kásiporynnyń jobalyq qýaty – jylyna 5 myń tonna ónim, bul respýblıka boıynsha 16 paıyzdyq ımportty almastyrýdy qamtamasyz etýi tıis. Zaýyt osy jyldyń sońyna deıin paıdalanýǵa beriledi dep josparlanǵan.
Premer-Mınıstr QR Prezıdentiniń «qarapaıym zattar ekonomıkasyn» damytý jónindegi alǵa qoıǵan mindetteri aıasynda halyq tutynatyn taýarlardyń aýqymdy nomenklatýrasynyń óndirisin qurý qajet ekenin atap ótti. «Qaǵaz ónimderin shyǵarý jobasyn iske asyrý óńirdiń áleýmettik-ekonomıkalyq damýyna mýltıplıkatıvti áser beretinine senimdimin», — dedi Álıhan Smaıylov.
Eske salsaq, naýryz aıynda Petropavlda jylý elektr ortalyǵynyń bir murjasy qulady.
Ortalyqtaǵy apatqa baılanysta qylmystyq is qozǵaldy.
Osy oqıǵa boıynsha Prezıdent oblys ortalyǵy men basqa da eldi mekenderdiń turǵyndaryn tez arada jylýmen qamtamasyz etýdi tapsyrdy. Petropavldaǵy apat bolǵan jylý ortalyǵynyń dırektory men bas ınjeneri qamaldy.