Úkimet basshysy turǵyn úı qurylysyn jandandyratyn «Nurly jer» baǵdarlamasyn ázirleýdi tapsyrdy

ASTANA. QazAqparat - Búgin jańa jasaqtalǵan Úkimettiń alǵashqy otyrysynda QR Premer-Mınıstri Baqytjan Saǵyntaev halyqty baspanamen qamtamasyz etýdiń keshendi qadamy retinde «Nurly jer» baǵdarlamasyn ázirleýdi júktedi. Eske sala keteıik, Memleket basshysy Nursultan Nazarbaev bundaı tapsyrmany jaqynda ótken Úkimettiń keńeıtilgen otyrysynda aıtqan bolatyn.

«Elbasy halyqty baspanamen qamtamasyz etýge keshendi qadam jasaýdy júktep otyr. Osyǵan baılanysty Ulttyq ekonomıka mınıstrligine oblys ákimderimen, múddeli memlekettik organdar jáne ulttyq kompanııalarmen birlese otyryp, «Nurly jer» biryńǵaı turǵyn úı qurylysy baǵdarlamasyn ázirleýdi tapsyramyn. Atalǵan baǵdarlamaǵa qoldanystaǵy baǵdarlamalardaǵy baspanaǵa qatysty máselelerdiń barlyǵy shoǵyrlanýy shart», - dedi B. Saǵyntaev.

Bul rette Úkimet basshysy Aýyl sharýashylyǵy mınıstrligine qoldanysta bar jer qoryna tıisti saraptama júrgizýdi, al óńir ákimderine bas josparlarynyń ózgerýine qatysty tıisti usynystar joldaýdy tapsyrdy.

«Prezıdent Nursultan Nazarbaev bul jańa baǵdarlamanyń áleýmettik mańyzdylyǵy joǵary ekenin, sondyqtan da ony halyqpen, bıznes ókilderimen jáne qoǵammen tııanaqty talqylaýdyń kerektigin atap aıtqan bolatyn. Memleket basshysynyń taǵy bir tapsyrmasy aǵymdaǵy jylǵy bıýdjetti naqtylaý. Bul rette, Elbasynyń tapsyrmalaryn júzege asyrý úshin bıýdjette tıisti qarjy shyǵyndarynyń aldaǵy úsh jyldyq bıýdjette qamtamasyz etilýin qadaǵalaý qajet», - dedi B. Saǵyntaev.