Úkimet basshysy tozyǵy jetken gaz jelilerine turaqty baqylaý jasaýdy tapsyrdy
11:50, 22 Aqpan 2023
ASTANA. QazAqparat – Elimizdegi gaz jelileriniń tozýy 60 paıyzǵa jýyqtaǵan. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.
«Gaz ınfraqurylymynyń ábden tozýy da mańyzdy másele bolyp tabylady. Búgingi tańda gaz jelileriniń tozýy shamamen 60 paıyzǵa jetti. Jylý jelileri ábden tozyp-bitken Ekibastuz ben Rýdnyıdaǵy jaǵdaıdy bárińiz kórip otyrsyzdar. Al, gaz jelilerine qysym óte joǵary, sondyqtan qaýip te joǵary», - dedi Álıhan Smaıylov.
Úkimet basshysynyń atap ótýinshe, magıstraldyq gaz qubyrlarynyń basym bóligi 30 jyldan astam ýaqyt buryn salynǵan jáne qomaqty qarajatty qajet etedi.
«Sondyqtan, Energetıka, Tótenshe jaǵdaılar mınıstrlikteri, ákimder men «Qazaqgaz» tarapynan baqylaý turaqty bolýy tıis. Al gaz ınfraqurylymyn jańǵyrtý jáne ýaqytyly jóndeý jumystaryna basymdyq berilýi kerek», - dedi Premer-Mınıstr.