Úkimet basshysy taýar baǵasy boıynsha jańa sharalar keshenin qabyldaýdy tapsyrdy

NUR-SULTAN. QazAqparat – Búgin Úkimet otyrysynda Premer-Mınıstr Asqar Mamın baǵa ósimi bolǵan óńir ákimdikterin synǵa aldy, dep habarlaıdy QazAqparat tilshisi.

«Sonymen qatar, osy jylǵy shildede ınflıatsııa ósti. Inflıatsııanyń ósýine azyq-túlik taýarlarynyń qymbattaýy kóp áser etti, baǵa 2020 jylmen salystyrǵanda 11 paıyzǵa ósken. Baǵanyń eleýli qymbattaýy Túrkistan oblysynda, Nur-Sultanda jáne Qaraǵandy oblysynda baıqaldy. Bul – eń aldymen, ákimdikter tarapynan sharalar jetkilikti qabyldanbaıdy degen sóz. Sharalardy kúsheıtip, erekshe baqylaýǵa alý qajet», - dedi A. Mamın.

Sonymen qatar ol áleýmettik mańyzy bar taýarlar baǵasyn turaqtandyrý boıynsha tapsyrma berdi.

«Ulttyq ekonomıka mınıstrligi múddeli memlekettik organdarmen birlesip, osy jylǵy tamyzdyń sońyna deıin ınflıatsııaǵa qarsy den qoıý sharalar keshenin, sonyń ishinde áleýmettik mańyzy bar taýarlar baǵasyn ósirmeý boıynsha jańa sharalar keshenin qabyldap, onyń iske asyrýdy bastaýǵa tapsyramyn. Barlyq óńirler josparlanǵan áleýmettik-ekonomıkalyq damý kórsetkishterine qol jetkizýdi jáne Memleket basshysy belgilegen mindetterdi tıimdi iske asyrýdy qamtamasyz etýi qajet», - dedi Úkimet basshysy.