Úkimet basshysy Shymkenttiń jańa ákiminiń aldyna birqatar mindet qoıdy

ASTANA. QazAqparat – Shymkent qalasynyń aktıvimen kezdesýi barasynda QR Premer-Mınıstri Álıhan Smaıylov Shymkenttiń respýblıkalyq mańyzy bar qala mártebesin alǵannan beri 5 jyldan astam ýaqyt ótkenin atap ótti, dep habarlaıdy QazAqparat Úkimettiń resmı saıtyna silteme jasap.

Úkimet basshysy atap ótkendeı, Shymkent qolaıly ekonomıkalyq jáne iskerlik ortasy bar qala bolýǵa tıis.

Ol úshin ınvestorlarǵa tıisti jaǵdaı jasap, qalanyń damýyna serpin beretin ónerkásiptik jobalardy iske asyrýǵa basymdyq berý qajet.

«Biz Shymkent qalasynyń shaǵyn jáne orta bıznes úshin ónerkásiptik aımaqtar qurý tájirıbesin keńinen qoldaımyz. Bıyl bul tájirıbeni barlyq óńirde qoldaný baǵdarlamasy júzege asyrylýda. Shymkent shaǵyn jáne orta bıznestiń ortalyǵy dep aıtýǵa bolady. Sol sebepti shaǵyn ındýstrııalyq aımaqtardy iske qosý jumystary jalǵasýǵa tıis», — dedi Álıhan Smaıylov.

Sonymen qatar azyq-túlik baǵasyn turaqtandyrý mańyzdy mindetterdiń biri bolyp otyrǵany atap ótildi.

Bul baǵytta qoldaǵy retteý jáne baqylaý tetikterin tıimdi paıdalaný, sondaı-aq qatar ishki naryqty sapaly otandyq taýarlarmen tolyqtyrý qajet. Qalalyq saýda-logıstıkalyq ortalyqty keńeıtý de osy maqsatqa jetýge yqpal etpek.

Qorytyndylaı kele, Premer-Mınıstr jańa ákimge jáne barlyq jergilikti atqarýshy organdardyń qyzmetkerlerine Memleket basshysy men Úkimet qoıǵan mindetterdi júzege asyrýdaǵy jumystaryna sáttilik tiledi.