Úkimet basshysy ser Sýma Chakrabartımen kezdesti

ASTANA. QazAqparat - QR Premer-Mınıstri Álıhan Smaıylov Reformalar jónindegi joǵary keńes tóraǵasynyń orynbasary ser Sýma Chakrabartımen kezdesip, Memleket basshysynyń 2022 jylǵy 1 qyrkúıektegi Qazaqstan halqyna Joldaýyn iske asyrý jónindegi Úkimettiń is-sharalaryn talqylady, dep habarlaıdy QazAqparat.

Álıhan Smaıylov Úkimet orta merzimdi kezeńge arnalǵan ekonomıkalyq saıasat jobasyn pysyqtap jatqanyn, onyń negizgi baǵyttary ekonomıkany ártaraptandyrý jáne jańǵyrtý, memlekettik basqarýdy reformalaý jáne adamı kapıtaldy keshendi damytý bolatynyn atap ótti.

Ulttyq tabys deńgeıiniń naqty ósýi men azamattardyń ál-aýqatyn arttyrýdy qamtamasyz etetin ornyqty ekonomıkalyq ósim atalǵan jumystardyń nátıjesi bolýy tıis.

Óz kezeginde ser Chakrabartı Úkimettiń jańa baǵdarlamasy qazirgi ekonomıkalyq jáne áleýmettik syn-qaterlerge pármendi jaýap bolatynyna senim bildirdi.

Sondaı-aq kezdesý barysynda taraptar jańa ınvestıtsııalyq jobalardy qarjylandyrý jáne eldiń azyq-túlik qaýipsizdigin qamtamasyz etý máselelerin talqylap, óńirlik kún tártibiniń ózekti baǵyttary boıynsha pikir almasty.

Foto: primeminister.kz