Úkimet basshysy óńirlik Bala quqyqtary jónindegi ýákil laýazymyn jyldam engizýdi tapsyrdy

NUR-SULTAN. QazAqparat – Óńir ákimdikteri janyndaǵy táýelsiz Bala quqyqtary jónindegi ýákilderdiń laýazymdaryn engizýdi tezdetý qajet. Bul týraly búgin Úkimet otyrysynda QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Oblys ákimdikterine áleýmettik jaǵynan az qamtylǵan sanattaǵy balalardy saýyqtyrý sharalarymen, jazǵy demalyspen jáne bos ýaqyttaryn paıdaly ótkizýmen barynsha qamtýdy tapsyramyn. Barlyq aýyldyq eldi-mekenderde sport alańdaryn, alalardy damytý ortalyqtaryn jabdyqtap, oıyn-saýyq, mádenı is-sharalar uıymdastyrý qajet», - dedi Úkimet basshysy.

Álıhan Smaıylov Densaýlyq saqtaý mınıstrligine shalǵaıdaǵy eldi-mekenderde balalardyń densaýlyq jaǵdaıyna skrınıngtik jáne stomatologııalyq tekserýler júrgizý úshin jyljymaly medıtsınalyq pýnktterdiń jumys isteýine qatysty sharalar qabyldaýdy tapsyrdy.

«Balalar quqyqtarynyń saqtalýyn qamtamasyz etý úshin Bilim mınıstrligi ákimdiktermen birlesip, óńir ákimdikteri janyndaǵy táýelsiz Bala quqyqtary jónindegi ýákilderdiń laýazymdaryn engizýdi tezdetsin», - dedi Premer-Mınıstr.