Úkimet basshysy «Nurly jer» baǵdarlamasy boıynsha óńirlerdiń jumysyn synǵa aldy

ASTANA. QazAqparat -Búgin Úkimet otyrysynda Premer-Mınıstr Baqytjan Saǵyntaev «Nurly jer» baǵdarlamasyn júzege asyrý tetikterin  túzetýdi tapsyrdy, dep habarlaıdy QazAqparat.

«Memleket basshysy «Nurly jer» baǵdarlamasy boıynsha halyqqa tıisti deńgeıde aqparat jarııalanbaı otyrǵanyna jáne oǵan bankterdiń qatysý belsendiginiń tómendigine nazar aýdardy. Biz osy máseleni birneshe márte talqylaǵan bolatynbyz. Óńirlerdiń kóbisi qurylys salýshylar nesıelerin sýbsıdııalaýǵa jáne ıpotekany qoldaý baǵytyn júzege asyrýǵa kirispegen de. Sonymen qatar jeke qurylys salýshylarmen jumystar tıimdi atqarylmaı otyr», - dedi B. Saǵyntaev.

Úkimet basshysy bul baǵytta ekinshi deńgeıli banktermen jumystar tıisti deńgeıde iske asyrylmaı jatqanyn synǵa aldy.

Onyń sózine qaraǵanda, «Turǵyn úı qurylys jınaq banki» salymshylar sany men kezekte turǵandardy eskermesten, óńirler arasynda qarjynyń árkelki bólinisi jalǵasýda.

«Sondyqtan Investıtsııalar jáne damý mınıstrligine «Báıterek» holdıngimen jáne óńir ákimderimen birlese 1 qazanǵa deıin baǵdarlama tetikterin túzetýdi qarastyratyn Úkimet sheshiminiń jobasyn engizýdi tapsyramyn. Sonymen qatar Investıtsııalar jáne damý mınıstrligi Aqparat jáne kommýnıkatsııalar mınıstrligimen birge baǵdarlama tetikterin aqparatttyq súımeldeý boıynsha medıa-jospardy bekitýi tıis. Ákimdikter osy jumysqa belsendi túrde aralasýy qajet», - dep atap ótti Premer-Mınıstr.