Úkimet basshysy munaıdan bıýdjetke túsetin qarajat týraly aıtty

ASTANA. QazAqparat - Álemdik munaı naryǵyndaǵy baǵalardyń arqasynda Ulttyq qor men respýblıkalyq bıýdjetke munaı-gaz sektorynan túsetin barlyq túsimder qamtamasyz etiledi. Bul týraly Senattyń jalpy otyrysynan keıin Úkimet basshysy Álıhan Smaıylov aıtty, dep habarlaıdy QazAqparat tilshisi.

«Bıýdjet kiristerine toqtalsaq, bıýdjet pen Ulttyq qor túsimderiniń azaıýy bolmaıtynyn baıqap otyrmyz. Mysaly, munaı sektorynan bir jylda Ulttyq qorǵa 3,9 trln teńge túsim josparlanǵan edi. Al 10 aıdyń qorytyndysy boıynsha bul jospar qazirdiń ózinde trıllıon teńgege artyǵymen oryndalǵanyn kórip otyrmyz», - dedi Álıhan Smaıylov Senattyń jalpy otyrysynan keıingi baspasóz máslıhatynda.

Úkimet basshysy respýblıkalyq bıýdjetke túsetin kiristerge de toqtaldy.

«Respýblıkalyq bıýdjetke túsetin kiristerdi aıtatyn bolsaq, biz eksporttyq kedendik baj salyǵy boıynsha jylyna 1,8 trln teńgeni josparlaǵan bolatynbyz. 10 aıdyń qorytyndysy boıynsha qazirdiń ózinde 1,4 trln teńge tústi, sondaı-aq qalǵan qarajat aldaǵy eki aıda túsedi. Álemdik munaı naryǵynda qalyptasyp jatqan konıýnktýra men baǵanyń arqasynda bizde munaı-gaz sektorynan Ulttyq qor men respýblıkalyq bıýdjetke túsetin barlyq túsimder tolyq kólemde qamtamasyz etiledi», - dedi Álıhan Smaıylov.

Foto: we1group.com