Úkimet basshysy McDonald's-tyń ketýine qatysty pikir bildirdi
«Elimizde iri halyqaralyq brendterdiń bolǵany jaqsy. McDonald's-tyń Qazaqstannan ketýi eldegi ınvestıtsııalyq ahýal nemese basqa da jaǵdaılarmen baılanysty emes. Bul tikeleı McDonald's kompanııasynyń Reseıden ketýimen baılanysty. Atalǵan ónim shıkizaty Reseı arqyly qamtamasyz etilip keldi. Taǵy bir sebep - McDonald's-dyń ónimderge qoıatyn joǵary talaptary. Ónimmen qamtý úshin jetkizýshiniń birqatar sertıfıkaty bolýy kerek. Bul jerde ónimniń sapasy da mańyzdy. Kompanııa talaptaryn oryndaý úshin aýqymdy ınvestıtsııa kerek. Qazaqstannyń naryǵy shekteýli, sondyqtan mundaı aýqymdy ınvestıtsııa qysqa merzimde qaıtarylmaıdy», - dedi Álıhan Smaıylov Úkimet úıinde ótken baspasóz máslıhatynda.
Premer-Mınıstrdiń málimdeýinshe, endigi maqsat - elimizdegi McDonald's jumysshylarynyń ornyn saqtap qalý.
«Ol úshin halyqaralyq brendti qoldanbaı, jumys isteýdi jalǵastyrý qajet. Sondaı-aq, jańa kompanııa shıkizat máselesin qazaqstandyq jetkizýshilermen birlesip aldyn ala sheshedi dep oılaımyn. Bul kompanııanyń turaqty jumys isteýin qamtamasyz etedi», - deıdi ol.
Eske salsaq, 5 qańtarda McDonald's elimizdegi qyzmetin resmı toqtatqan edi.
«Oǵan sebep - et jetkizýdegi shekteýler. Jaqyn arada jańa ataýmen jyldam tamaqtaný meıramhanalary qaıta ashylady. Ashylý merzimi qosymsha jarııalanady», - dep habarlady McDonald's Qazaqstandaǵy ókildiginiń baspasóz qyzmeti