Úkimet basshysy: Qurylys materıaldaryn shyǵaratyn óndiristi barlyq óńirde ashý kerek

ASTANA. QazAqparat - Qurylys materıaldaryn shyǵaratyn óndiristi barlyq óńirde uıymdastyrý qajet. Bul týraly búgin «Nurly jer» baǵdarlamasy qaralǵan Úkimet otyrysynda Premer-Mınıstr Asqar Mamın aıtty, dep habarlaıdy QazAqparat tilshisi.

«Úkimettiń keńeıtilgen otyrysynda Elbasy qurylystaǵy otandyq úlesti ulǵaıtý mindetin qoıdy. Otandyq qurylys materıalyn shyǵarý - «qarapaıym zattar ekonomıkasy» baǵdarlamasynyń arnaıy baǵyty. Onyń oryndalýyna 600 mlrd teńge kóleminde qarajat bólinip otyr», - dedi Úkimet basshysy.

Premer-Mınıstrdiń aıtýynsha, ol úshin jeńildikpen qarjylandyrý boıynsha memlekettik qoldaý sharalary kózdelgen.

«Osy baǵytta jańa jobalardy damytý kerek. Jergilikti ónimdi paıdalaný ekonomıkanyń basqa salalaryna mýltıplıkatıvti áser etedi, jumys oryndaryn qurýǵa múmkindik beredi», - dedi Premer-Mınıstr.

Osy oraıda ol qazirgi ýaqytta Túrkistan qalasynda aýqymdy qurylys júrip jatqanyn eske saldy.

«Osy jerde qurylys materıaldaryn shyǵarý boıynsha jobalardy júzege asyrý qajet. Biz bul máseleni Ómirzaq Estaıulymen (Túrkistan oblysynyń ákimi - avt.) talqyladyq. Jalpy, osyndaı óndiristerdi barlyq óńirlerde uıymdastyrý qajet. Baqylaý Jeńis Mahmudulyna júkteledi»,- dedi A.Mamın orynbasary Jeńis Qasymbekke qarata.