Úkimet basshysy Qostanaıdaǵy úı qurylysy kombınatyna bardy

QOSTANAI. QazAqparat – QR Premer-Mınıstri Asqar Mamın óńirge issapary barysynda Qostanaı úı qurylysy kombınatyna bardy, dep habarlaıdy QazAqparat tilshisi.

Premer-Mınıstr kásiporynnyń óndiris alańdaryn aralap, armatýra, qabyrǵa panelderi, temir-beton plıtalary óndirisimen tanysty. Kásiporyn kópqabatty turǵyn úı, mektep jáne ónerkásip ǵımarattaryn salýǵa qajetti qurylys materıaldaryn jasaıdy.

Kombınat jylyna 70 myń sharshy metrlik turǵyn úı turǵyzýǵa jetetin temir-beton buıymdaryn shyǵarady. Ónimder Qostanaı oblysy men Nur-Sultan, Almaty, Túrkistan, Taldyqorǵan qalalaryna jiberiledi. Sondaı-aq Reseıdiń Chelıabi, Ekaterınbýrg, Túmen, Qorǵan oblystaryna eksportttalady. Qýatty óndiris oshaǵy 154 adamdy turaqty jumyspen qamtyp otyr. Jumysshylardyń ortasha jalaqysy 113 myń teńge. 2019 jylǵy qańtar-qyrkúıek aılarynda 526,4 mln teńgeniń ónimin shyǵarǵan.

Oblys ákimi Arhımed Muhambetovtiń aıtýynsha, Qostanaıdaǵy «Aeroport» shaǵyn aýdanyn salýǵa paıdalanylǵan temir-beton buymdardyń deni osy kásiporyndiki. «Qonaı», «Bereke» shaǵyn aýdandarynda salynatyn turǵyn úılerge de «Qostanaı-MBI» ónimderi paıdalanylady.

Aıta ketsek, bul kombınatty eldiń Údemeli ındýstrııalyq-ınnovatsııalyq damý memlekettik baǵdarlamasyn iske asyrý boıynsha Úkimettiń esebimen tanysýy barysynda Elbasy Nursultan Nazarbaev iske qosqan bolatyn.