Úkimet basshysy: Qashyqtan jumys isteý tapsyrmany oryndaý sapasyn tómendetken joq

NUR-SULTAN. QazAqparat – Qashyqtan jumys isteý tájirıbesi tapsyrmany oryndaý sapasyn tómendetpegenin kórsetti. Bul týraly respýblıkalyq telearnalardan kórsetilgen «Samuryq-Qazyna» ulttyq ál-aýqat qoryn basqarý jónindegi keńestiń otyrysynda QR Premer-Mınıstri Asqar Mamın málim etti, dep habarlaıdy QazAqparat.

«Koronavırýs qaterine baılanysty «Samuryq-Qazyna» qory qyzmetkeleriniń qashyqtan jumys isteýi tájirıbesin qoldaımyz. Aldyńǵy qatarly birqatar analıtıkalyq agenttikterdiń boljamyna sáıkes, atalǵan trend osy pandemııanyń uzaq merzimdi saldarynyń biri bolmaq», - dep toqtaldy Úkimet basshysy.

Sonymen qatar A. Mamın memlekettik organdar qyzmetshileriniń qashyqtan jumys isteýi tájirıbesi týraly aıtty.

«Bul tájirıbe Úkimette de, óńirlerde de iske asyrylýda. Búginde 23 memlekettik organ «bultty» qujat aınalymǵa qosylǵan. Qyzmetkerlerge qashyqtan jumys isteýge múmkindik jasaldy. Memorgandardyń 70 paıyzǵa jýyq qyzmetshisi qashyqtan jumys isteý rejımine kóshti. Qashyqtan jumys tájirıbesi tapsyrmany oryndaý sapasyn tómendetpegenin kórsetti. Qaýlylardy qabyldaý merzimi eki esege azaıdy, 22-den 13 jumys kúnine deıin», - dedi Asqar Mamın.