Úkimet basshysy dárigerlerdiń eńbekaqysy qaı deńgeıde ósetinin aıtty

NUR-SULTAN. QazAqparat - Barlyq óńirde 20 zamanaýı medıtsınalyq ortalyq salynady. Bul týraly Májiliste «Nur Otan» partııasynyń saılaý aldyndaǵy mindettemelerin iske asyrýǵa arnalǵan talqylaý kezinde Premer-Mınıstr Asqar Mamın málim etti, dep habarlaıdy QazAqparat tilshisi.

«Jańa syn-qaterdi eskere otyryp, otandyq densaýlyq saqtaý salasyn bilikti kadrlarmen, zamanaýı jabdyqpen, dıagnostıka ári emdeý ádisterimen qamtamasyz etý boıynsha naqty qadamdar júzege asyrylady. Dárigerlerdiń eńbekaqysy 2023 jyly 2,5 esege, 561 myń teńgege deıin ósedi. Orta medıtsınalyq personaldyń jalaqysy 2010 myń teńgege deıin artady», - dedi A. Mamın.

Onyń aıtýynsha, barlyq kózderden densaýlyq saqtaý salasyn qarjylandyrý JІÓ-den 5 paıyzǵa deıin kóteriledi.

«2025 jylǵa deıin barlyq óńirde 20 zamanaýı medıtsınalyq ortalyq salynady. 2022 jyly Nur-Sultan men Almatyda eki ǵylymı-ınnovatsııalyq kópbeıindi klınıka iske qosylady», - dedi A. Mamın.