Úkimet basshysy: Aýyldardy ınternetpen qamtamasyz etýdi ýaqtyly sheshý qajet
«Tótenshe jaǵdaı kezinde ınternetpen turaqty túrde qamtamasyz etý – Memleket basshysy Qasym-Jomart Kemeluly Toqaevtyń erekshe baqylaýynda. Qazirgi jaǵdaıda ınternet halyqtyń negizgi baılanys arnasyna aınaldy. Ol sondaı-aq elektrondy saýda, onlaın-oqý, elektrondyq memlekettik qyzmetter, densaýlyq saqtaý, qarjy jáne ekonomıka, basqa da salalarda mańyzdy qural bolyp otyr. Belsendi paıdalanýshylar qatary artyp keledi. Sondyqtan «Tsıfrlyq Qazaqstan» baǵdarlamasy aıasynda ınternet jelisin paıdalanýshylardyń úlesi 88 paıyzǵa deıin, al tsıfrlyq saýattylyqtyń deńgeıi 83 paıyzǵa jetedi», - dedi Asqar Mamın Úkimet otyrysynda.
Premer-mınıstr bul mindetterdi osy jyldyń sońyna deıin júzege asyrý – 5163 eldimekendi keń jolaqty ınternetpen qamtamasyz etýge múmkindik beretinin jetkizdi.
«Nátıjesinde aýyldarda 7,6 mıllıonnan astam adam onlaın bilim alýǵa, elektrondy saýdaǵa qol jetkizedi. Osyǵan oraı Tsıfrlyq damý, ınnovatsııalar jáne aeroǵarysh ónerkásibi mınıstrligine baılanys ortalyqtarymen birlesip, josparlanǵan eldimekenderdi ınternetpen qamtamasyz etý jobalaryn ýaqtyly iske asyrý úshin barlyq sharany qabyldaýdy tapsyramyn. Ákimdikterge antennalyq-machtalyq qurylystardy salýǵa jáne baılanys jelisin tartýǵa jer bólýdi, elektr jelisimen qamtamasyz etý máselesin jedel sheshýdi júkteımin», - dedi ol.