Úkimet basshysy aýyl sharýashylyǵy óniminiń tıimdiligin kóterýge qatysty tapsyrma berdi

NUR-SULTAN. QazAqparat – Búgin Úkimet otyrysynda aýyl sharýashylyǵy salasyndaǵy sýbsıdııanyń tıimdiligin arttyrý máselesi qaraldy, dep habarlaıdy QazAqparat tilshisi.

Premer-Mınıstr Álıhan Smaıylov sýbsıdııa alýshylar úshin aldaǵy ýaqytta qandaı qarsy mindettemeler qoıylatynyn jáne osy mindettemelerdiń oryndalýy deńgeıi qalaı baqylanatynyn surady.

Óz kezeginde QR Aýyl sharýashylyǵy mınıstri Erbol Qarashókeev qazirgi kezde sýbsıdııa alýshylarǵa birde-bir qarsy mindemeleler qoıylmaǵanyn eske saldy.

«Sol sebepti alynǵan sýbsıdııalardy paıdalaný barysynda jaýapkershilik óte tómen, sondaı-aq tıimdiligi de shektelip otyr. Sondyqtan tıisti qarsy mindettemelerdi engizýdi josparlaı kele, barlyq sýbsıdııa alýshylar úshin óndiris kólemin tómendetpeý, mal sharýashylyǵynda jyl saıyn mal basyn keminde 5 paıyzǵa ulǵaıtý, 100 analyqqa shaqqanda keminde 80 bas tól alý eskerilip otyr. Ósimdik sharýashylyǵyna toqtalsaq, tuqym sharýashylyǵy egistikteriniń úles salmaǵyn 15 paıyzdan kem bolmaý mindettemesin de josparlap otyrmyz», - dedi mınıstr

Onyń aıtýynsha, ınvestıtsııalyq sýbsıdııalaý kezinde fermelerdiń jobany kórsetilgen merzimde paıdalanýǵa berýi nazarǵa alynady.

«Odan basqa, jobalyq qýatyna der kezinde qol jetkizilýin kózdep otyrmyz. Osynyń bári arnaıy qurylǵan jumys tobynda talqylanyp, maquldanǵannan keıin engizetin bolamyz. Eń mańyzdysy, qoıylǵan qarsy mindettemelerdiń oryndalýyn baqylaý protsesi adamnyń qatysýynsyz tsıfrlyq tehnologııalar negizinde engizilmek. Sýbsıdııalaýdyń biryńǵaı memlekettik aqparattyq júıesinde avtomattandyrylǵan túrde engiziledi», - dedi Erbol Qarashókeev.

Osy oraıda Úkimet basshysy Á. Smaıylov baqylaýdy tsıfrlandyrý arqyly júrgizý kerek ekenin qoldady.

«Degenmen qarsy mindettemelerdiń tizimin taǵy da bir pysyqtap shyǵý kerek. Qarsy mindettemeler aýyl sharýashylyǵy óniminiń tıimdiligin kóterý kerek. Osy jumysty yntalandyrý mańyzdy. Sondyqtan bul máseleni jumys tobynda pysyqtap, tıisti usynystardy engizińizder», - dedi Premer-Mınıstr.

Budan buryn habarlanǵandaı, E. Qarashókeev sýbsıdııa alýshylar ózderine naqty ındıkatıvtik kórsetkishterge qol jetkizý boıynsha qarsy mindettemelerdi mindetti túrde qabyldaıtyn norma engiziletinin aıtty.