Úkimet basshysy aýrýxanalardyń qurylysyn qatań baqylaýǵa alýdy tapsyrdy

ASTANA. QazAqparat - Mınıstrler kabınetiniń búgingi otyrysynda Densaýlyq saqtaý mınıstri Eljan Birtanov jergilikti atqarýshy organdardyń bıýdjet qarjysyn jaýapsyz jumsap jatqanyn jetkizdi. Máselen, Astanada balalarǵa arnalǵan ınfektsııalyq emxanada bir jatyn orynǵa 240 sharshy metr qarastyrylǵan. Ondaı kórsetkish xalyqaralyq talaptardan eki ese artyq bolyp tur, dep xabarlaıdy QazAqparat tilshisi.

"Sonda ondaı qurylys nysandary qalaı salynady? Sebebi ondaı normatıvterdi ózimiz qabyldaımyz. Turǵyn úı sharýshashylyǵy men qurylys isteri jónindegi komıteti qaıda qarap otyr? Densaýlyq saqtaý mınıstrligi de durys málimet bermeıdi. Sóıtip "qurylys jumystary kóp bolsa, bıýdjet aqshasyn kóp alamyn" deıtinder kóbeıedi. Artynan ol aýrýxanada adam jatyr ma, joq pa, oǵan qarap otyrǵan eshkim joq", - deıdi QR Úkimet basshysy. Osy oraıda Baqytjan Saǵyntaev aýrýxanalardyń úlgilik jobasyn bekitýdi usyndy.

Densaýlyq saqtaý mınıstri Eljan Birtanov ta úlgilik jobalardyń bolǵanyn durys dep esepteıdi. Sebebi emxanalardyń qurylysy barysynda xalyqtyń sany eskerilmeı jatady. "Osyǵan qatysty jaýapkershilikti zań júzinde bekitý kerek. Óıtkeni biz ózimiz qurylys jumystaryn baqylaı almaımyz. Ondaı quziretimiz joq. Mınıstrlik osyndaı-osyndaı aýrýxanany salý qajet deıdi, onyń arǵy jaǵy bizdiń baqylaýymyzǵa kirmeıdi. Bul jerde júıeni ózgertý kerek", - dep atap kórsetti Birtanov.

Premer-Mınıstr aýrýxanalardyń qurylysyna aqsha suraıtyndardyń barlyq qujattaryna, eń bastysy, nysannyń kólemi men xalyq sanyna nazar aýdarýdy tapsyrdy.