Úkimet basshysy apatty jaǵdaıdaǵy sý qubyrlaryn shuǵyl jóndeýdi tapsyrdy

NUR-SULTAN. QazAqparat – Bıyl halyqty sapaly aýyz sýmen qamtamasyz etý kórsetkishin aýyldarda - 94,7, al qalalarda - 98,5 paıyzǵa jetkizý qajet. Bul týraly búgin Úkimet otyrysynda QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Jyl sońyna deıin halyqty sapaly aýyz sýmen qamtamasyz etý kórsetkishin aýyldarda - 94,7, al qalalarda - 98,5 paıyzǵa jetkizý qajet. Osyǵan baılanysty óńir ákimdikterine sýmen jabdyqtaýdyń keshendi josparyn tez arada qaıta naqtylaýdy jáne apatty jaǵdaıdaǵy sý qubyrlaryn shuǵyl túrde jóndeýdi tapsyramyn. Aýyz sý máselesi turǵyndar úshin óte ózekti», - dedi Úkimet basshysy.

Sondyqtan Álıhan Smaıylov árbir sheshim ýaqytyly qabyldanyp, nátıjeli bolýy kerektigin basa aıtty.

«Turǵyndardy sýmen qamtamasyz etý jónindegi óńirlik saıasatty iske asyrý barysynda Túrkistan, Batys Qazaqstan, Jambyl jáne Qaraǵandy oblystarynyń ákimdikteri 2023 jyly izdestirý-barlaý jumystary men jobalyq-smetalyq qujattardy daıyndaýdy aıaqtaýy qajet. Munyń barlyǵy eldi mekenderdi sýmen qamtamasyz etý jónindegi josparlanǵan kórsetkishterdi sapaly oryndaýǵa múmkindik beredi», - dedi ol.