Úkimet azyq-túlik baǵasyn turaqtandyrý úshin qandaı jumystar atqaryp jatyr
«Bul ınflıatsııanyń qarqyndy ósý máselesi dúnıejúzinde bolyp jatqan jaǵdaı. Mysaly AQSh-ta baǵalardyń ósýi 8,8 paıyzdy, Eýroodaq memleketterinde – 8,6 paıyzdy qurap otyr. Kórshiles elderde de baǵa ósýde. BUU janyndaǵy Azyq-túlik uıymynyń derekteri boıynsha, dúnıejúzinde azyq-túlik baǵasy bir jylda 34 paıyzǵa ósken», - dedi Álıhan Smaıylov Ulttyq arnada «Jańa Qazaqstan» baǵdarlamasynda.
Premer-Mınıstrdiń aıtýynsha, bul jaǵdaı pandemııada bastaldy, sodan keıin túrli geosaıası jaǵdaılar boldy. Ár memleket túrli shekteýler qoıyp, logıstıka máseleleri týyndap, osynyń negizinde álem boıynsha baǵa ósýde.
«Bizde de ınflıatsııa deńgeıi qazir 14,5 paıyzdy qurady. Biraq degenmen biz baǵalardyń negizsiz ósýine jol bermeý úshin jáne ári qaraı arzandatý úshin arnaıy ınflıatsııaǵa qarsy is-qımyl josparyn qabyldap, jyl basynan beri iske asyryp kelemiz. Onyń eń birinshi júıeli sharasy – ishki naryqty tolyǵymen otandyq ónimmen qamtamasyz etý. Ol úshin biz jyl basynan beri aýyl sharýashylyǵyna kórsetiletin qarjylaı kómekti eki esege ulǵaıttyq. Mysaly kóktemgi egis pen kúzgi jınaý jumystaryna qarjyny 70 mıllıardtan 140 mıllıardqa jetkizdik. Forvardtyq satyp alý sharalaryna qarajatty 40 mıllıardtan 80 mıllıardqa deıin ulǵaıttyq», - dedi Á. Smaıylov.
Jalpy bıyl aýyl sharýashylyǵyna degen qarajat kólemi 300 mlrd teńge bolsa, kóktemde bıýdjetti naqtylaǵan kezde ony eki esege ulǵaıtqan.
«Sonymen birge biz apta saıyn Úkimette selektr rejıminde bul máseleni óńirlermen birge talqylaımyz. Taǵy da birneshe jedel sharalar qabyldaýdamyz. Ol birinshiden, saýda-sattyqqa baılanysty keıbir kedergilerdi joıý. Ekinshiden, turaqtandyrý qorlaryna qosymsha qarajat bólip, sol qorlardy óńirlerde qurý. Aınalym shemasy degen arnaıy tásil bar. Sonyń nátıjesinde otandyq ónim shyǵarýshylar bizdiń saýda júıelerin turaqty baǵamen tıisti azyq-túlikti qamtamasyz etedi. Oǵan qosa, monopolııaǵa qarsy retteý sharalaryn kúsheıtýdemiz. Byltyr zańnamaǵa arnaıy áleýmettik taýardaǵy saýda ústemesi 15 paıyzdan aspaýy kerek degen normany qabyldadyq. Árbir saýda ortalyǵynda sol normanyń monıtorıngin kúsheıtýdemiz. Osynyń barlyǵy baǵalardy turaqtandyrýǵa oń yqpalyn tıgizedi dep oılaımyz», - dedi Úkimet basshysy.