Úkimet «ArselorMıttal Temirtaý» boıynsha belsendi kelissózder bastap ketti - Premer-Mınıstr

QARAǴANDY. QazAqparat – Óńir aktıvimen kezdesýde Premer-Mınıstr Álıhan Smaıylov oblys basshylyǵy ekonomıkany, ınfraqurylymdy, kásipkerlikti jáne áleýmettik salany damytý jónindegi sharalardy iske asyrýdy jalǵastyrýy tıis ekenin atap ótti. Bul týraly QazAqparat Úkimettiń telegram kanalyna silteme jasap habarlaıdy.

Úkimet basshysy áleýmettik mańyzy bar azyq-túlik taýarlary baǵasynyń kúrt jáne negizsiz ósýine jol bermeýdi basty basymdyqtardyń biri dep atady.

«Naryqty otandyq óndiristiń sapaly ónimderimen qamtamasyz etý boıynsha jumys júrgizý qajet. Onyń keń assortımenti men jetkilikti bolýy baǵanyń ósýin tejeıdi. Bul baǵytta ákimdik jumys isteýi kerek», - dedi Álıhan Smaıylov.

Sonymen qatar, Premer-Mınıstr modernızatsııa qarqyny tómen jáne tehnologııalyq jaǵdaıy nashar «ArselorMıttal Temirtaýdaǵy» jaǵdaıǵa toqtaldy. Ónerkásiptik qaýipsizdikke nemquraıly qaraýdyń saldarynan ólim-jitim kóbeıip barady. Búgin kásiporynnyń taǵy bir qyzmetkeri qaza tapty.

«Munyń bári – kompanııa basshylyǵynyń tikeleı jaýapkershiligi. Osyǵan baılanysty olarǵa kásiporynnyń eshqandaı syn kótermeıtin barlyq baǵyttary boıynsha narazylyq bildirildi. Qazir Úkimet bul máselelerdi retteý boıynsha belsendi kelissózder bastap ketti», - dedi Álıhan Smaıylov.

Sondaı-aq, ol ónerkásiptik óndiristerdiń ekologııalyq jaǵdaıǵa tıgizetin zardabyn azaıtý, «Saran» ındýstrııalyq aımaǵyn damytý, bilikti mamandardy daıarlaý, jalaqyny ýaqtyly tóleý jáne óndiristegi jazataıym oqıǵalardyń aldyn alý máselelerin baqylaýda ustaý qajettigin atap ótti.

Buǵan deıin habarlanǵanyndaı, Memleket basshysynyń Jarlyǵymen Qaraǵandy oblysynyń ákimi bolyp Ermaǵanbet Bólekpaev taǵaıyndaldy.

Sondaı-aq, «ArselorMıttal Temirtaý» AQ metallýrgııalyq zaýytynyń kokshımııalyq óndirisinde apat bolyp, bir adam kóz jumdy.

«ArselorMıttal Temirtaý» kompanııasynyń jumysy toqtaýy múmkin ekeni habarlandy.

Foto: t.me/KZgovernment