Úkimet agrarlyq ǵylymdy damytýǵa nazar aýdarýy tıis - Elbasy

ASTANA. QazAqparat - QR Úkimeti men Aýyl sharýashylyǵy mınıstrligi agrarlyq ǵylymdy damytý máselesine baıypty nazar aýdarýy qajet. Bul týraly búgin QR Parlamenti palatalarynyń birlesken otyrysynda Memleket basshysy Nursultan Nazarbaev aıtty, dep habarlaıdy QazAqparat tilshisi.

«Agroónerkásip kesheni salasyndaǵy zańnamalar odan ary jetildirýdi talap etedi. Biz bul jaıynda da az aıtqan joqpyz. Bul - bizdiń ekonomıkamyzdyń iri sektory. Salanyń bolashaǵy zor, bizge jumys isteý qajet»,- dedi Nursultan Nazarbaev.

Memleket basshysy saqtandyrý, agrarlyq qolhatty engizý, kredıt seriktestikterin damytý, sonymen qatar veterınarııa salasyndaǵy baqylaý júıesin jetildirý qajettigine nazar aýdartty. 

«Úkimet pen Aýyl sharýashylyǵy mınıstrligi agrarlyq ǵylymdy damytý máselesine baıypty nazar aýdarýlary qajet. Biz bul jaıynda da aıtqan bolatynbyz. Zańnamalyq túzetýlerdiń sáıkesinshe toptamasy ázirlengen jáne Parlamenttiń qaraýynda jatyr», - dedi Elbasy.

Aıta ketý kerek, búgin Memleket basshysy QR Parlamenti palatalarynyń birlesken otyrysyna qatysyp, turǵyn úı-kommýnaldyq sharýashylyq salasyndaǵy máselelerdi sheshýdi tapsyrdy. Sonymen qatar, kelesi Joldaýda qandaı máseleler qozǵalatynyn aıtty.