Úkimet 5 kúnde pandemııamen kúrestiń jedel sheshimder algorıtmin daıyndaıdy

NUR-SULTAN. QazAqparat - Úkimet pandemııamen kúreste jedel sheshimder qabyldaýdyń quqyqtyq algorıtmin daıyndaıdy. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi Aqorda baspasóz qyzmetiniń Twitter-degi paraqshasyna silteme jasap.

«Úkimetten 5 kúnniń ishinde pandemııamen jáne onyń saldarymen kúres bóliginde jedel sheshimder qabyldaýdyń quqyqtyq algorıtmin daıyndaýdy suraımyn. Mundaı sıpattaǵy sheshimder bir, ary ketkende eki táýlik merzimniń ishinde qabyldanyp, júzege asyrylýy tıis»,- dedi QR Prezıdenti.

Aıta keteıik, vıdeobaılanys arqyly ótip jatqan jıynda Úkimet 2020 jyldyń alǵashqy jarty jyldyǵyndaǵy elimizdiń áleýmettik-ekonomıkalyq damý qorytyndysy týraly esep berdi. Sondaı-aq koronavırýsqa qarsy kúreske qatysty qabyldanǵan sharalar, Memleket basshysynyń Úkimettiń aldaǵy ýaqytta atqaratyn jumysynyń negizgi baǵyttary boıynsha bergen tapsyrmalary men mindetteri qarastyryldy.

Elimizdiń áleýmettik-ekonomıkalyq damýynyń qorytyndylary men jyl sońyna deıin oryndaıtyn mindetter jóninde Premer-Mınıstr Asqar Mamın, aqsha-nesıe saıasatyna qatysty sharalar týraly Ulttyq banktiń tóraǵasy Erbolat Dosaev, elimizdegi epıdemıologııalyq ahýaldy jaqsartý jónindegi sharalar týraly Densaýlyq saqtaý mınıstri Alekseı Tsoı baıandama jasady.