Úkimet 2050 jylǵa deıin Astanany álemdegi úzdik 50 qalanyń qataryna qospaq

Aldaǵy 27 jylda elordany «Álemniń úzdik qalalary» halyqaralyq reıtıngisinde alǵashqy 50 shahardyń qataryna engizý josparlanyp otyr. Bul týraly Ulttyq ekonomıka mınıstrligi jarııalaǵan «Astanany damytýdyń keıbir máseleleri týraly» zań jobasynyń konsýltatıvtik qujatynda jazylǵan, dep habarlaıdy QazAqparat tilshisi.

«Jobanyń maqsaty – 2050 jylǵa deıin Astana qalasyn «Álemniń úzdik qalalary» halyqaralyq reıtıngisinde alǵashqy 50 qalanyń qataryna kirgizý», - delingen Ashyq NQA portalynda jarııalanǵan konsýltatıvtik qujatta.

Atalǵan mejege umtylys jolynda myna baǵyttaǵy jumystardy qolǵa alý josparlanǵan:

- Elordanyń ózekti máselelerin, onyń ishinde turǵyndardyń shaǵymdaryn dereý sheshý;

- Astananyń aqparattyq bazasyn qurý;

- Turǵyndardyń ál-aýqatyn arttyrý, bıznes ortanyń damytý;

- Gazben jylytýǵa kóshý, sondaı-aq ruqsat etilmegen qoqys úıindilerin joıý esebinen elordadaǵy ekologııalyq jaǵdaı men aýa sapasyn jaqsartý;

- Astananyń sáýlettik kelbetin saqtaý;

- Qalada kedergisiz orta qurý;

- Halyq arasyndaǵy áleýmettik shıelenisti tómendetý.

Konsýltatıvtik qujat 5 qazanǵa deıin kópshilik talqylaýda bolady.

Sonymen qosa osy qujatta ómir súrýge qolaıly álem qalalarynyń «Quality of living city ranking» reıtıngisinde Almaty shahary 177-orynda turǵany jazylǵan.