Úkimet 2018 jyly munaı baǵasyna boljamdy 60 dollar deńgeıinde belgiledi

ASTANA. QazAqparat - Búgin Májiliste «2018-2020 jyldarǵa arnalǵan respýblıkalyq bıýdjet týraly» QR Zańyna ózgerister men tolyqtyrýlar engizý týraly» zań jobasy men 2022 jylǵa deıingi naqtylanǵan áleýmettik-ekonomıkalyq damý boljamy tanystyryldy, dep habarlaıdy QazAqparat tilshisi.

«Álemdik ekonomıkadaǵy aǵymdaǵy ahýaldy, taýar naryqtarynyń konıýnktýrasyn, 2017 jyldy jáne 2018 jylǵy qańtar-qyrkúıektegi Qazaqstan ekonomıkasy salalarynyń aldyn ala damý qortyndylaryn eskere otyryp, 2018 jylǵa makroekonomıkalyq kórsetkishterdiń boljamy naqtylandy. Bazalyq stsenarıde munaı baǵasy 2018 jyly 55 AQSh dollarynan 60 AQSh dollaryna deıin artty», - delingen taratylǵan málimette.

Nomınaldy jalpy ishki ónim 58 242,9 mlrd teńge kóleminde baǵalandy. Bul sáýirde maquldanǵan boljamǵa qatysty 1 036, 2 mlrd teńgege artyq. Jalpy ishki ónimniń naqty ósýi 3,8 paıyz deńgeıinde saqtaldy. Sonymen qatar, ekonomıka salalarynyń ósý boljamy da saqtaldy.

Belgili bolǵandaı, eksport boıynsha boljam 2,6 mlrd dollarǵa artyp, 56,5 mlrd dollardy qurady. Al ımport 33,2 mlrd dollardy qamtymaq.

Budan bólek, Ulttyq bank jyldyq ınflıatsııanyń nysanaly dálizin buryn josparlanǵan 5-7 paıyz sheginde saqtady.

Aıta keteıik, Elbasy Nursultan Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyn jarııalaý barysynda bıýdjettik shyǵystardyń basymdyqtaryn qaıta qaraýdy mindettegen bolatyn.