Úkimet 2018 jyly 16 zań jobasyn ázirleıdi

ASTANA. QazAqparat - El Úkimeti 2018 jyly 16 zań jobasyn ázirlep, Parlamentke engizetin bolady. Bul týraly búgin Úkimettiń selektorlyq rejimdegi otyrysynda QR Ádilet mınıstri Marat Beketaev aıtty, dep habarlaıdy QazAqparat.

«QR Ádilet mınıstrligi «Quqyqtyq aktiler týraly» Zańnyń talaptaryna jáne Úkimettiń reglamentine sáıkes Úkimettiń Zań jobalaý jumystarynyń 2018 jylǵa arnalǵan josparynyń jobasyn ázirledi. Jospar jobasy kelesi jyly 16 zań jobasyn ázirlep, Parlamentke engizýdi kózdeıdi. Sonyń ishinde 7 joba zań shyǵarý jumysynyń tujyrymdamalyq josparynan, eki joba quqyqtyq saıasat tujyrymdamasynan týyndaıdy», - dedi ol.

Mınıstrdiń aıtýynsha, taǵy 4 zań jobasy Prezıdent Ákimshiligi men Úkimet basshysynyń tapsyrmalaryna sáıkes engiziledi.

«Eki zań jobasy bıýdjettik kodekstiń normalarynan týyndaıdy. Qalǵan bir zań jobasy memlekettik organnyń óz bastamasy  bolyp tabylady. Kelesi jyly memlekettik organdarmen 10 saladaǵy zańnamany jetildirý  josparlanýda. Sonymen qatar 3 jańa zań ázirlenetin bolady. Atap aıtqanda, Memleket pen azamat arasynda jarııaly quqyqtyq qatynastardan týyndaǵan quqyq týraly daýdy sheshetin ákimshilik rásimdik protsestik kodeks jobasyn ázirleý kózdelýde. Gıdrotehnıkalyq qurylystardyń apattaryn tómendetý, aldyn alý  jáne shekteý boıynsha birqatar mindetterdiń rettelýin kózdeıtin gıdrotehnıkalyq qurylystar qaýipsizdigi týraly jańa zań jobasy ázirlenetin bolady. Sondaı-aq tarıhı-mádenı  mura máseleleriniń keshendi  rettelýiniń quqyqtyq negizderin budan da tıimdi etip qalyptastyrýǵa baǵyttalǵan tarıhı-mádenı mura nysandaryn qorǵaý jáne paıdalaný týraly jańa zań jobasyn ázirleý kózdelýde», - dedi Beketaev.