ÚIIDMB: «Avrora» óndiristik kesheni 40-tan astam preparattyń shyǵarylymyn jolǵa qoıdy

ASTANA. QazAqparat - «Avrora» óndiristik kesheni 40-tan astam preparattyń shyǵarylymyn tirkedi jáne jolǵa qoıdy, dep habarlady «NADLoC» jergilikti damytý boıynsha ulttyq agenttigi» AQ «Avrora» ÓK-ge silteme jasaı otyryp, Strategy2050.kz saıty.

«Avrora» óndiristik kesheni medıtsınalyq uıymdardyń, kommýnaldyq mekemelerdiń, tamaq ónerkásibiniń qajettiligine arnalǵan zalalsyzdandyratyn jáne antıseptıkalyq dáriler shyǵaratyn otandyq zaýyt. 2012 jyldan beri 2012-2014 jyldarǵa arnalǵan Qazaqstan Respýblıkasynyń údemeli ındýstrıaldy-ınnovatsııalyq damý memlekettik baǵdarlamasynyń qatysýshysy bolyp keledi.

Kásiporynnyń óndiristik qýaty jylyna 10,8 myń tonnany quraıdy. Óndiriske tartylǵan ınvestıtsııa quny 970 000 000 teńgeden astam somany quraıdy. Keshen 40-tan astam preparatty tirkep, olardyń shyǵarylymyn jolǵa qoıdy.

Kásiporyn Ortalyq Azııadaǵy zalalsyzdandyratyn quraldar óndirisi boıynsha eń iri jáne zamanaýı zaýyt bolyp tabylady, sondaı-aq TMD-daǵy iri zaýyttardyń biri. Kompanııanyń basty mindeti - uqsas ónimderdiń ımportyn almastyrý.

Búgingi tańda zaýyt jańa retseptýralardy ázirleý boıynsha Germanııanyń, Reseı men Belarýstiń jetekshi ǴZI-men tyǵyz baılanys ornatqan. Zalalsyzdandyratyn dárilerdiń óndirisine qajet shıkizatty jetkizýshiler - Akzonobel, BASF, Huntsman, Clariant sekildi jetekshi eýropalyq hımııalyq kontsernder.

2014 jyly Reseı Federatsııasynyń 15 óńirinde ózindik saýda jelisiniń fılıaldary ashyldy. Qazirgi tańda Reseıge 300 tonnadan astam ónim jóneltildi.