ÚIIDB uzaq mer­zimdi sıpatyna qaramastan qazirdiń ózinde áleýmettik-ekonomıkalyq tıimdilik kórsete bastady - Á.Isekeshev

ASTANA. 13 maýsym. QazAqparat - Údemeli ındýstrıaldy-ınnovatsııalyq damý baǵdarlamasy uzaq mer­zimdi sıpatyna qaramastan qazirdiń ózinde áleýmettik-ekonomıkalyq tıimdilik kórsete bastady. «Egemen Qazaqstan» gazetine bergen suhbatynda QR Premer-Mınıstriniń orynbasary - QR Indýstrııa jáne jańa tehnologııalar mınıstri Áset Isekeshev osylaı málim etken.

Mınıstrdiń atap ótýinshe, 2008 jylmen salystyrǵanda ótken jyly qaıta óńdeý ónerkásibindegi óndiris ónimdiligi 1,5 ese artty. 2011 jylmen salystyrǵanda, eksport kólemi 2012 jyly 5,3 paıyzǵa ósip, 92,3 mıllıard AQSh dollaryn qurady. «Ótken jyly biz 25,5 mıllıard dollardyń qaıta óńdelgen taýarlaryn eksporttadyq. Ósim 14 paıyz kóleminde boldy. Osy merzim ishinde shetelderge daıyn taýarlar shyǵarý kólemi edáýir ósip, 4,2 mıllıard dollarǵa jetti», - dedi ol.

Á.Isekeshevtiń alǵa tartqan derekterine qaraǵanda, qazaqstandyq eksporttyń jaǵrafııasy 111 memleketti qurady. Ótken 4 jyl ishinde ekonomıkadaǵy jumys orny 600 myńǵa artyp, 8 mıllıon adamnan asty. Onyń ishinde ónerkásip oryndarynda 85 myń jańa jumys orny ashyldy. Onyń 41 myńy Indýstrııalandyrý kartasyndaǵy 537 jobanyń iske qosylýy nátıjesinde múmkin boldy. Bul óte mańyzdy turaqtandyrý sharasy ekendigi sózsiz.

«Sonymen birge, ústimizdegi jyly Indýstrııalandyrý kartasyndaǵy jobalar qurylysynda 80 myń adam jumyspen qamtylǵan. Bul baǵdarlamanyń óńirlerdiń ekonomıkasyna tıgizip otyrǵan ıgi yqpaly da zor. Joǵaryda aıtylǵan jetistikterdiń bári Eýropany turalatqan jahandyq daǵdarys jaǵdaıynda bolyp otyr. Osynyń ózi kóp jaıdy ańǵartsa kerek», - dedi Á.Isekeshev.