ÚIID MB jobalarynyń ónimderi álemniń 110 eline eksporttalady - S. Ahmetov
Úkimet «Údemeli ındýstrııalyq-ınnovatsııalyq damý memlekettik baǵdarlamasyn (ÚIID MB) bizdiń elimizdiń ındýstrııalandyrý baǵdarlamalarynyń eń negizgileriniń biri dep esepteıdi. Osy baǵdarlama aıasynda birqatar mańyzdy áleýmettik-ekonomıkalyq damý kórsetkishterine qol jetkizildi. Ol júzege asyryla bastaǵan 3 jyldan beri óndiriste jumys isteıtinder sany 9%-dan astam ósip, 550-den astam jobalar iske asyrylyp, 2 trln. teńgeden astam somanyń ónimderi shyǵaryldy. Indýstrııalyq-ınnovatsııalyq jobalardy iske qosý men odan ári paıdalaný sheńberinde bıýdjetke 1 trln. teńge tústi», - dedi sársenbide ótken QR Parlamenti Májilisiniń plenarlyq otyrysy barysynda S.Ahmetov.
Úkimet basshysy ónimderi álemniń 110-nan astam eline eksporttalyp otyrǵan jańa kásiporyndar 250 jańa ónim túrlerin shyǵaratyn óndiristi ıgergenin atap ótti.
«Ekonomıkanyń jańa salalary paıda boldy. Bul oraıda transporttyq mashına jasaý salasyn aıtsa da jetkilikti. Lokomotıvter, vagondar, avtokólikter sııaqty buryn shyǵarylmaǵan ónimder túrlerin óndirý ıgerildi. Bul aǵym odan ári jalǵasýda»,-dep atap ótti S.Ahmetov.
S.Ahmetov, ÚIIDMB jáne basqa salalyq baǵdarlamalar sheńberindegi bıznesti memlekettik qoldaý sharalarynyń 1 bıýdjettik teńgege tıisinshe, 100 teńge jeke ınvestıtsııalar tartýǵa múmkindik beretinin atap kórsetti.