ÚIID baǵdarlamasynyń jobalary úshin kadrlar daıarlaý isine 104 kolledj tartylyp otyr
2012 jyly ÚIID baǵdarlamasynyń jobalary úshin kadrlar daıarlaý isine 104 kolledj jumyldyrylyp otyr. Oǵan qosa, Elbasynyń tapsyrmasy boıynsha elimizde álemdik deńgeıdegi kolledjder jelisi qurylýda.
«Búginde halyqaralyq standarttardyń negizinde ... aldyńǵy qatarly kásiptik-tehnıkalyq bilim berýshi uıymdardyń jelisi damytylýda», - dedi Elbasy N.Nazarbaev «Áleýmettik-ekonomıkalyq jańǵyrtý -Qazaqstan damýynyń basty vektory» atty Qazaqstan halqyna Joldaýynda.
Tehnıkalyq jáne kásiptik bilim berý júıesi eńbek naryǵy men halyqaralyq talaptardyń suranystaryna saı jańǵyrtylýda. Astana, Shymkent, Aqtóbe jáne Almaty qalalarynda álemdik deńgeıdegi kolledjder ashý jumysy bastaldy. Oǵan qosa, Atyraý, Ekibastuz, Óskemen, Shymkent qalalarynda 4 óńiraralyq ortalyqtyń jáne Astana qalasynda 1 kásiptik lıtseıdiń qurylysy júrgizilýde. Jalpy alǵanda, 2012 jyly kolledjderdiń materıaldyq-tehnıkalyq bazalaryn nyǵaıtýǵa 2,4 mlrd. teńge qarastyrylyp otyr, dep jazady rm.kz saıty.
Aıta ketý kerek, 2011 jyly elimizde kadrlar daıarlaý júıesin basqarýdyń jańa vedomstvoaralyq modeli jasaldy. Nátıjesinde bıznes-qaýymdastyqtardyń qatysýymen Kásiptik-tehnıkalyq bilim berý jónindegi ulttyq keńes, jumys berýshilerdiń atsalysýymen 16 óńirlik jáne 14 salalyq keńester quryldy. Osylaısha, bıznestiń qatysýymen basqarýdyń korporatıvtik formasy aldymen «Kásipqor» holdınginiń bazasynda synaqtan ótkizilip, odan keıin búkil tehnıkalyq jáne kásiptik bilim berý júıesine taratylmaq. Sonymen qatar, kásiptik-tehnıkalyq bilim berýshi mekemelerge «Samuryq-Qazyna» Qorynyń kásiporyndary arqyly oqytýdyń dýaldy júıesi engizilýde.
Jáne elimizde Dúnıejúzilik banktiń qatysýymen kásiptik-tehnıkalyq bilim berý júıesin jańǵyrtý jobasy qolǵa alynyp otyr. Іske asyrýǵa 33,2 mln. dollar bólingen bul joba boıynsha 147 kásiptik standart jasaý, kásiptik-tehnıkalyq bilim berý júıesin basqarý men qarjylandyrýdy jańǵyrtý jumystary qarastyrylyp otyr.
Qazirgi ýaqytta elimizde sondaı-aq kolledjderdi ulttyq attestatsııadan ótkizý jáne olardy Týrın protsesiniń aıasyndaǵy salystyrmaly zertteýlerge qatystyrý jónindegi daıarlyq dumystary bastaldy.
Bilim jáne ǵylym mınıstrliginiń habarlaýynsha, 2011 jyly elimizdegi kásiptik jáne tehnıkalyq bilim berý uıymdarynyń jalpy jelisi 896 birlikti quraǵan, bir jyldyń ishinde olardyń qataryna 14 oqý orny qosylǵan. Qazir olarda 609 myń adam bilim alýda. Aǵymdaǵy jyly 104 oqý orny ÚIID baǵdarlamasynyń jobalary úshin kadrlar daıarlaý isine jumyldyrylyp otyr.
Tehnıkalyq jáne kásiptik bilim berý júıesin jańǵyrtý isi ÚIID baǵdarlamasynyń aıasynda iske asyrylyp otyr jáne ondaǵy maqsat jańa kadrlar daıarlaý isine bıznes pen jumys berýshilerdi belsendi tartý bolyp tabylady.