ÚIID baǵdarlamasyn júzege asyrý úshin kadrlardy daıarlaýǵa 10 mlrd. teńge bólindi
Bul týraly QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Bilim jáne ǵylym vıtse-mınıstri Takır Balyqbaev málim etti.
«Elbasynyń Qazaqstan halqyna «Nurly jol - bolashaqqa bastar jol» atty Joldaýynda ÚIID MB úshin kadrlardy daıarlaý maqsaty qoıyldy. Búginde aldaǵy 3 jylǵa 10 joǵary oqý ornyna 10 mlrd. teńge qarjy bólindi»,-dedi T. Balyqbaev.
«10 joǵary oqý ornyna toqtalatyn bolsaq, biz Joldaý jarııalanǵannan keıin qazir ártúrli baǵyttaǵy 12 joǵary oqý ornyn tańdap aldyq jáne olar arnaıy daıyndyq jumystaryn júrgizip jatyr»,-dedi mınıstrdiń orynbasary.
Onyń sózine qaraǵanda, bul JOO-lardyń arasynda Nazarbaev Ýnıversıteti, QazUÝ, Qazaq ulttyq agrarlyq ýnıversıteti, Qazaq ulttyq tehnıkalyq ýnıversıteti, Eýrazııa ulttyq ýnıversıteti, Qazaq agro-tehnıkalyq ýnıversıteti, Qostanaı memlekettik ýnıversıteti, Pavlodar memlekettik ýnıversıteti, ShQO tehnıkalyq ýnıversıteti, OQO tehnıkalyq ýnıversıteti, Qaraǵandy memlekettik tehnıkalyq ýnıversıteti, sondaı-aq Atyraý munaı jáne gaz ınstıtýty qamtylǵan.
«Bul joǵary oqý oryndarynyń barlyǵy qazirgi kezde damý baǵdarlamalaryn daıarlaýda jáne ózderiniń usynystaryn ázirleýde. Sodan keıin aldaǵy aptada olardyń baǵdarlamalaryn tyńdap, sonyń arasynan 10-nyn iriktep, Úkimetke usynamyz. Osy 10 JOO bekitilip, bul baǵytta jumys isteıtin bolady. Tańdalyp alynǵan joǵary oqý oryndary ındýstrııanyń barlyq baǵyttaryn qamtyp otyr»,-dedi T. Balyqbaev.
Budan buryn habarlanǵandaı, Qazaqstanda ÚIID MB mamandaryn 10 JOO daıyndaıtyn bolady. Aldaǵy 5 jyl kóleminde elimizdegi joǵary oqý oryndary Údemeli ındýstrııalyq-ınnovatsııalyq damý baǵdarlamasyna ózindik úlesin qospaqshy. T. Balyqbaevtyń aıtýynsha, osy maqsatta qajetti qarjy bólinip, jańa bilim berý baǵdarlamalary jasalyp, sondaı-aq materıaldyq baza kúsheıtilip, professorlyq-oqytýshylyq quram keńeıtiletin bolady.