Ýhanda koronavırýs tabylyp, lokdaýn engizilgennen beri úsh jyl ótti

ASTANA. QazAqparat – Úsh jyl buryn Qytaıdyń Ýhan qalasynda jańa tıpti koronavırýs ınfektsııasy paıda bolyp, álemde eń alǵashqy lokdaýn engizilgen bolatyn, dep habarlaıdy QazAqparat Euronews agenttigine silteme jasap.

Belgisiz vırýs týraly habar paıda bolǵannan keıin Ýhan balyq bazary jabylyp, turǵyndarǵa qaladan shyǵýǵa tyıym salyndy, kólik qatynasy toqtady.

Ol kezdegi oqıǵany 10 kúnde salynǵan ýaqytsha aýrýhana eske salady.

«Bul óte qıyn úsh jyl bolatyn. Barlyǵy jumysta jáne ómirde túrli qıyndyqqa tap boldy», - deıdi qala turǵyndarynyń biri.

«Árıne, biz qoryqtyq: ol kezde qanshama adam aýyrdy! Biraq keıin eshkim juqtyrmady. Taıaýda birneshe jaǵdaı boldy, biraq aýrý sımptomdary jeńil boldy. Bul jyl odan jaqsy bolady. Qazir biz vırýstan qoryqpaımyz. Qorqynysh joq. Qorǵanyp, maska taǵyp júrmiz», - deıdi jýrnalısterge egde áıel.

2020 jyldyń basynda Ýhan bazary jabylǵanyna qaramastan jańa vırýs álemge tez tarady.

Qytaı bıligi COVID-19 aýyr jaǵdaıynyń sany eldegi aýrýhanadarda eki ese tómendegenin habarlady.

Alaıda tek resmı derekter boıynsha, 13-19 qańtarda koronavırýs ınfektsııasynan 12 myńnan astam adam qaza tapqan.

Foto: Ng Han Guan/AP