Úgitilip jatyr: Aqtóbede mlrd teńgeniń velojolynan shý shyqty
Aqtóbe qalasynyń turǵyny ıÝrıı Kýlıkovtiń shaǵymy negizinde Aqtóbe oblysy boıynsha ishki memlekettik aýdıt departamenti qalalyq TÚKSh, jolaýshylar kóligi jáne avtomobıl joldary bólimine aýdıt júrgizdi.
Aýdıtorlar qaladaǵy velojol sal jumysynyń qujatynan birqatar kemshilik anyqtady.
— Aqtóbe qalalyq TÚKSh, jolaýshylar kóligi jáne avtomobıl joldary bólimi men «Global Construction Development» JShS arasynda 1 327 872 000 teńgege kelisimshart jasalǵan. «Aqtóbe qalasynda velojoldardy jaılastyrý» boıynsha konkýrs jarııalaǵanymen, jobalyq-smetalyq qujat bolmaǵan. Bul jerde «Sáýlet, qala qurylysy jáne qurylys qyzmeti týraly» zańnyń 60-baby 1-tarmaǵynyń talaptary buzylyp tur. Bul — birinshi buzýshylyq. Ekinshiden 665 761 900 teńgeniń jumysy atqaryldy dep aqsha aýdardy. Aýdıt kezinde 34 mln teńgeden astam qarjynyń jumysy atqarylmaǵany belgili boldy. Osy kemshilikterge qaramastan Aqtóbe qalalyq TÚKSh, jolaýshylar kóligi jáne avtomobıl joldary bólimi aktige qol qoıyp, jumysty qabyldap alǵan, — dedi Aqtóbe oblysy boıynsha ishki memlekettik aýdıt departamentiniń basshysy Saken Qasymov.
Sonymen birge Aqtóbe oblysy boıynsha ishki memlekettik aýdıt departamenti memlekettik satyp alýdy júrgizý barysynda jobalyq-smetalyq qujattamanyń bolmaǵany úshin qalalyq TÚKSh, jolaýshylar kóligi jáne avtomobıl joldary bólimi men «Global Construction Development» JShS-i arasyndaǵy kelisimshartty jaramsyz dep taný jóninde sotqa talap aryz berdi.
Sot talap aryzdy qanaǵattandyrdy. Alaıda áli zańdy kúshine engen joq.
Al anyqtalǵan buzýshylyqtar, ıaǵnı, atqarylmaǵan jumysqa qarjy tólegeni úshin Aqtóbe qalalyq TÚKSh, jolaýshylar kóligi jáne avtomobıl joldary bólimine nusqama berildi.
ıAǵnı, buzýshylyqtar joıylyp, qarjy keri qaıtarylýy tıis.
Óz kezeginde qalalyq TÚKSh, jolaýshylar kóligi jáne avtomobıl joldary bólimi «Global Construction Development» JShS-nen 34 781 900 teńgeni qaıtaryp alý úshin sotqa talap aryz berdi. Qazir is qaralyp jatyr.
Aqtóbe oblystyq soty baspasóz qyzmetiniń habarlaýynsha, jobalyq-smetalyq qujattamasy, saraptama qorytyndysy bolmasa da qurylys-montajdaý jumysyn júrgizgen merdigerge qatysty is Aqtóbe oblystyq qylmystyq ister jónindegi sot alqasynda qaralyp, merdigerge Ákimshilik quqyqbuzýshylyq týraly kodekstiń «Tehnıkalyq reglamentterde belgilengen talaptardy qospaǵanda, sáýlet, qala qurylysy jáne qurylys qyzmeti salasyndaǵy Qazaqstan Respýblıkasynyń zańnamasy men memlekettik normatıvterdiń talaptaryn buza otyryp, jobalaý aldyndaǵy, izdestirý, jobalaý, qurylys-montajdaý jumystaryn oryndaý» baby boıynsha 200 AEK, ıaǵnı, 690 000 teńge kóleminde aıyppul salyndy.
Apellıatsııalyq qaýly zańdy kúshine endi.