ÚEU-lar kepildendirilgen dári-dármekpen qamsyzdandyrý máseleleri boıynsha azamattardyń ótinishterin qabyldaı bastady
Uıymdastyrýshylar «jedel jeli» telefondary arqyly Qazaqstan azamattaryn kepildendirilgen dári-dármekpen qamsyzdandyrýdyń qoljetimdiligine baqylaý júrgizýge nıet bildirip otyr. Mundaǵy basty maqsat - tegin jáne jeńildikpen beriletin dári-dármekpen qamsyzdandyrý máselesin zertteýge jáne máseleniń ashyqtyǵy men tıimdiligin arttyrýǵa baǵyttalǵan. Bul bastamaǵa «Amansaýlyq» qoǵamdyq qory bastamasy bolyp otyr.
«Amansaýlyq» QQ prezıdenti Baqyt Túmenovanyń aıtýynsha, mundaı shara alǵash ret 2008 jyly «Soros-Qazaqstan» qorynyń qoldaýymen elimizdiń 6 qalasynda uıymdastyrylǵan-dy. Onda jarty jyldyq jumysty taldaý nátıjesinde shaǵymdardyń 70 paıyzǵa jýyǵy kepildendirilgen dári-dármekpen qamsyzdandyrý máselesine qatysty bolǵan edi.
«Ótinishterge tegin jáne jeńildik boıynsha jiberiletin dári-dármektiń qoljetimdilik deńgeıin baǵalap qana qoımaı, dıstrıbıýtordy engizgennen bergi ózgeristerdi baqylaýǵa múmkindik beredi. Atalǵan máseleni keńinen zertteý maqsatynda biz osyndaı monıtorıngti Shyǵys Qazaqstan jáne Qyzylorda oblystarynyń aýyldyq eldi mekenderinde júrgizetin bolamyz», - dedi ol.
«Jedel jeli» telefon qyzmeti «Soros-Qazaqstan» qorynyń «Memlekettik qorlar ashyqtyǵy» baǵdarlamasy sheńberinde qoldaý tapqan «Kepildendirilgen dári-dármekpen qamsyzdandyrý júıesiniń ashyqtyǵyn arttyrý jáne QR azamattarynyń dári-dármek quraldaryna qoljetimdiligin arttyrý» jobasynyń bir bóligi bolyp tabylady.
«Amansaýlyq» qoǵamdyq qory azamattardyń «jedel jeli» telefondaryna kelip túsetin ótinishterin qabyldaýdy Qyzylorda qalasynda «Jastar máseleleri ortalyǵy», Qaraǵandy qalasynda «Bilim jáne damý» jáne Semeı qalasynda «Úı» qoǵamdyq birlestikterimen birlese júzege asyrǵaly otyr.
Shara 4 aı boıy jalǵasyp, qorytyndylary 2011 jyldyń aqpan aıynyń sońynda belgili bolady.