ÚEU-lar arasyndaǵy «Tańdaý» baıqaýynyń jeńimpazdary anyqtaldy

ALMATY. QazAqparat - Almatyda ótip jatqan Azamattyq forým aıasynda el damýyna úles qosqan úkimettik emes uıymdar arasyndaǵy «Tańdaý» syılyǵynyń jeńimpazdary anyqtaldy, dep habarlaıdy QazAqparat tilshisi.

ÚEU arasynda «Tańdaý» syılyǵy bıyl alǵash ret 15 nomınatsııa boıynsha ótkizilip otyr. Baıqaýdyń negizgi ıdeıasy – 10 jyldan astam tájirıbesi bar qazaqstandyq ÚEU qyzmetiniń jetistikterin áleýmettik jáne qoǵamdyq ómirge, Qazaqstannyń táýelsizdigin nyǵaıtý men azamattyq qoǵamdy qalyptastyrýda qosqan úlesterin kópshilikke jarııa etý.

15 nomınatsııa boıynsha jeńimpazdar anyqtaldy:

1. «Bilim, ǵylym, aqparat, dene shynyqtyrý jáne sport salasyndaǵy maqsattarǵa qol jetkizý» - Batys Qazaqstan oblystyq múgedek balalardyń qoǵamdyq birlestigi.

2. «Azamattardyń densaýlyǵyn saqtaý, salaýatty ómir saltyn nasıhattaý» - «Qazaqstan sańyraýlar qoǵamy» QB.

3. «Qorshaǵan ortany qorǵaý» - «Qazaqstannyń ekologııalyq qory» QQ.

4. «Jastar saıasaty men balalar bastamalaryn qoldaý» - «Biryńǵaı «Jas Ulan» balalar men jasóspirimder uıymy» RQB.

5. «Otbasylyq, demografııalyq jáne genderlik máselelerdi sheshý» - «Aq-Otaý» otbasy ortalyǵy.

6. «Halyqtyń áleýmettik osal toptaryn qoldaý» - Halyqtyń áleýmettik osal toptaryn qoldaý.

7. «Jetim balalarǵa, tolyq emes jáne kóp balaly otbasylardan shyqqan balalarǵa kómek» - «Qoǵamdy aqparattyq qoldaý» JQ.

8. «Halyqty jumyspen qamtýǵa járdemdesý» - «Jer-Ana Astana» QB.

9. Azamattar men uıymdardyń quqyqtaryn, zańdy múddelerin qorǵaý - «Qazaqstan tutynýshylardyń quqyqtaryn qorǵaý qoǵamy» QB

10. Mádenıet pen ónerdiń damýy - «ShQ oblystyq kitaphanashylar qaýymdastyǵy» QB

11. Tarıhı-mádenı murany qorǵaý - «Ulttyq volonterlik jeli» qaýymdastyq túrindegi ZTB

12. «Qoǵamdyq kelisim men ulttyq birlikti nyǵaıtý» - «Aýǵan soǵysy ardagerleri» odaǵy

13. «Probatsııa qyzmeti esebinde turǵan adamdarǵa áleýmettik-quqyqtyq kómek kórsetýge járdemdesý» - «Quqyq» QQ.

14. «Memlekettik qyzmetterdi kórsetý sapasyna qoǵamdyq monıtorıng júrgizý» - «Perishte» QB .

15. Azamattyq qoǵamdy damytýǵa, onyń ishinde úkimettik emes uıymdar qyzmetiniń tıimdiligin arttyrýǵa járdemdesý – «KAMEDA» QQ.

Syılyqpen marapattalǵan tulǵalarǵa tıisti nomınatsııa boıynsha «Respýblıkalyq «Tańdaý» syılyǵynyń laýreaty» ataǵy, laýreattyń ataýly dıplomy jáne estelik músinshe berildi.

Aıta keteıik, «Tańdaý» baıqaýyn Qazaqstannyń Azamattyq alıansy Qazaqstan Respýblıkasy Aqparat jáne qoǵamdyq damý mınıstrliginiń qoldaýymen uıymdastyrdy.

ÚEU-lar kelesi krıterııler boıynsha baǵalandy:

- uıymnyń úkimettik emes sektordaǵy 10 jyldan astam jumys tájirıbesi;

- maqsatty toptardyń, aımaqtyń ne jalpy el ómirindegi jumys nátıjeleriniń mańyzdylyǵy jáne áleýmettik áseri;

- is-sharalar men júzege asyrylatyn jobalardyń áleýmettik mańyzdylyǵy;

- is-áreket tájirıbesi men nátıjeler taralymy (mýltıplıkator effektisi);

- usynystar, qoǵam men BAQ pikiri

Konkýrs komıssııasynyń quramyna birqatar qoǵamdyq-saıası jetekshiler, ÚEU ókilderi, parlament depýtattary, bıznes qurylymdar men memlekettik organdardyń, halyqaralyq uıymdardyń ókilderi endi.