ÚEU-lar arasynda jyl saıynǵy syıaqy taǵaıyndaldy

ASTANA. QazAqparat - Din isteri jáne azamattyq qoǵam mınıstrligi 2017 jylǵy 1 qyrkúıekke deıin úkimettik emes uıymdarǵa arnalǵan syıaqyny berý úshin ótinimderdi qabyldaýdy bastady, dep habarlaıdy QazAqparat vedomstvonyń baspasóz qyzmetine silteme jasap.

Syıaqylar áleýmettik-mańyzy bar jobalardy júzege asyrýda aıtarlyqtaı nátıjege qol jetkizgen úkimettik emes uıymdarǵa beriletin bolady.

Onyń eń tómengi mólsheri aılyq eseptik kórsetkishtiń (AEK) eki myńǵa eselengen kólemine teń. Bir nomınatsııa boıynsha syıaqy bir nemese birneshe úmitkerge berile alady, mundaı jaǵdaıda qarajat jeńimpazdar arasynda teń mólsherde bólinedi.

Syıaqylar ÚEU-nyń ınstıtýtsıonaldyq damýyna, uıymnyń jarǵylyq maqsattaryna, qyzmetkerlerdiń biliktiligin arttyrýǵa, uıymnyń materıaldyq bazasyn arttyrýǵa baǵyttalatyn bolady.

Baıqaýǵa qatysýǵa Qazaqstan Respýblıkasynyń aýmaǵynda tirkelgen barlyq úkimettik emes uıymdarǵa ruqsat etiledi.

Marapat jyl saıyn 15 nomınatsııa boıynsha tapsyrylmaq.

Alǵashqy syıaqy kelesi baǵyttar boıynsha taǵaıyndalady: bilim berý, ǵylym, aqparat, dene shynyqtyrý jáne sport salasyndaǵy maqsattarǵa qol jetkizý; azamattardyń densaýlyǵyn saqtaý, salaýatty ómir saltyn nasıhattaý; qorshaǵan ortany qorǵaý; jastar saıasaty men balalar bastamalaryn qoldaý; demografııa problemalaryn sheshý; genderlik problemalardy sheshý jáne t.b.

Tolyq aqparatpen QR Din isteri jáne azamattyq qoǵam mınıstrliginiń saıtynda tanysýǵa bolady.